Şərqin ilk satirik jurnalı "Molla Nəsrəddin"in nəşrinin 104-cü ildönümü münasibətilə Naxçıvan Dövlət Universitetində  növbəti ənənəvi "Mirzə Cəlil günləri" keçirilmişdir. Birhəftəlik silsilə tədbirlər çərçivəsində universitet əməkdaşları mövzu ilə bağlı kütləvi informasiya vasitələrində çıxışlar etmiş, universitet televiziyasında rəngarəng verilişlər hazırlanmış, tələbələrin dahi ədibin  ev-muzeyinə ekskursiyaları təşkil edilmişdir. Ali təhsil ocağının Tələbə Teatr Studiyasında əməkdar mədəniyyət işçisi Gülxarə Əhmədovanın rejissorluğu ilə səhnələşdirilmiş "Ölülər" tragikomediyası  yeni quruluşda böyük rəğbətlə qarşılanmışdır. Tələbələrin IX karikatura sərgisi isə  Azərbaycanda karikatura sənətinin də təməlini qoymuş "Molla Nəsrəddin" jurnalının mübariz ruhunun yaşadılması, Naxçıvanda karikatura məktəbinin formalaşması, tələbə rəssamların siyasi-ideoloji düşüncə və sənətkarlıq cəhətdən inkişafı istiqamətində böyük nailiyyət kimi qarşılanmışdır. Silsilə tədbirlər "Molla Nəsrəddin və müasir dövr" elmi konfransı ilə yekunlaşmışdır.

Konfransı giriş sözü ilə açan rektor, akademik İsa Həbibbəyli Azərbaycan ədəbiyyatının nəhəng simalarından olan demokrat ədib, naşir-publisist Cəlil Məmmədquluzadənin yaradıcılığını böyük azərbaycannamə kimi dəyərləndirmişdir. Qeyd olunmuşdur ki, ötən il mirzəcəlilşünaslıq tarixinə əlamətdar il kimi daxil olmuşdur. Azərbaycan Respublikasının Prezidenti cənab İlham Əliyevin  görkəmli yazıçı və ictimai xadim Cəlil Məmmədquluzadənin anadan olmasının 140 illiyi haqqındakı 6 fevral 2009-cu il tarixli sərəncamı ilə  bir sıra yaddaqalan tədbirlər həyata keçirilmişdir. Naxçıvan Muxtar Respublikasının Ali Məclisinin sədrinin təşəbbüsü və dəstəyi ilə işıq üzü görən yubiley nəşrləri isə poliqrafik, elmi-ideoloji baxımdan xüsusi əhəmiyyət kəsb edir. Tanınmış mirzəcəlilşünas dahi ədibin həyat və yaradıcılığı ilə bağlı Naxçıvanda aparılan çoxsaylı tədqiqatlardan,  əldə etdiyi son elmi yeniliklərdən də söz açmışdır. 

Çıxışlarda vurğulanmışdır ki, ustad Mirzə Cəlil və onun mollanəsrəddinçi qələm dostlarının azərbaycançılıq məfkurəsi, milli istiqlal və bəşəri dəyərlər uğrunda mübarizələri həmişəyaşardır, gələcək nəsillər üçün misilsiz örnəkdir.

Konfransda fotoslaydlar və kitab sərgisi də nümayiş etdirilmişdir.  

Mehriban SULTAN,
NDU-nun Mətbuat
şöbəsinin müdiri