Cənubi Koreyanın Qimçon Universitetinin Beynəlxalq Təhsil Mərkəzinin direktoru, Otelçilik və turizm idarəçiliyi fakültəsinin professoru Hee Chun Lee və adıçəkilən mərkəzin direktor müavini, İngilis dili fakültəsinin professoru David K.H.Lee Naxçıvan Dövlət Universitetində olmuşlar. Ali məktəblə tanışlıqdan sonra  qonaqları NDU-nun rektoru, akademik İsa Həbibbəyli qəbul etmişdir. Görüş zamanı Qimçon Universitetinin təmsilçiləri tədris müəssisəsi haqqında ətraflı məlumat vermişlər.

NDU-nun rektoru, akademik İsa Həbibbəyli Naxçıvan Dövlət Universitetində 11 fakültənin, 47 ixtisasın mövcud olduğunu, Misir Ərəb Respublikası, Nigeriya, Banqladeş, Almaniya, Türkiyə Cümhuriyyəti və İran İslam Respublikasından 251 tələbənin, o cümlədən Cənubi Koreyadan 6 nəfərin burada təhsil aldığını bildirmişdir. Rektor dünya elminə inteqrasiya edən bu ali məktəbdə elmin, təhsilin inkişafı ilə yanaşı, ən müasir informasiya kommunikasiya texnologiyalarının tətbiqinə də xüsusi əhəmiyyət verildiyini, dünyanın ən məşhur universitetləri ilə birgə videokonfransların, simpoziumların keçirildiyini, elmi tədqiqatlar, təcrübə mübadilələri aparıldığını vurğulamışdır.

Professorlar Hee Chun Lee və David K.H.Lee çıxışlarında universitetlərarası əlaqələrə, o cümlədən elmi nüfuza, mükəmməl kadr potensialına və maddi-texniki bazaya malik Naxçıvan Dövlət Universiteti ilə tərəfdaşlığa böyük əhəmiyyət verdiklərini qeyd etmişlər.

Sonda qarşılıqlı əməkdaşlıq haqqında müqavilə imzalanmışdır.

Koreyalı qonaqlar ikigünlük səfər çərçivəsində NDU-nun tədris korpuslarında, struktur bölmələrində olmuş, xoş səfər təəssüratlarını universitet televiziyası vasitəsilə paylaşmışlar. Universitetin Konservatoriya binasında Cənubi Koreyanın Qimçon Universitetini tanıtma filminin təqdimatı keçirilmiş, İncəsənət fakültəsinin müəllim və tələbələri rəngarəng konsert proqramı ilə çıxış etmişlər.                

Mehriban SULTAN