Aprelin 29-da "Palace Hotel"də "Yerli hakimiyyət orqanları ilə qeyri-hökumət təşkilatları arasında himayədar (foster) qayğı və ailə əsaslı xidmətlər üzrə əməkdaşlıq modelinin işlənib hazırlanması" layihəsi çərçivəsində "Azərbaycanda himayədar qayğı sisteminin yaradılması" mövzusunda konfrans keçirildi.

Tədbirdə ayrı-ayrı nazirliklərin, beynəlxalq və qeyri-hökumət təşkilatlarının təmsilçiləri və digər qurumların nümayəndələri iştirak edirdilər.

Konfransı açan Nazirlər Kabinetinin Elm, mədəniyyət, təhsil və sosial problemlər şöbəsi müdirinin müavini Qurban Əmirov bu tədbirin çox əhəmiyyətli bir məsələyə həsr olunduğunu deyərək müzakirələrin maraqlı və səmərəli keçəcəyinə inandığını bildirdi. Q.Əmirov əsas məqsədi pilot seçilmiş Əzizbəyov rayonunda alternativ qayğı növü kimi himayədar (foster) ailə sisteminin yaradılması mexanizmlərinin qurulması olan layihə çərçivəsində görüləcək işlər və həyata keçirilməsi nəzərdə tutulan tədbirlər haqqında məlumat verdi.

YUNİSEF-in Azərbaycandakı nümayəndəsi Mark Herevard və Avropa Komissiyasının ölkəmizdəki nümayəndəsi Məryəm İsmayılova öz çıxışlarında layihənin uğurla icra olunacağına inamlarını ifadə etdilər və bu işin bütün tərəfdaşlarına təşəkkürlərini bildirdilər.

Sonra bir neçə təqdimat dinlənildi. "Ümidli gələcək" təşkilatının prezidenti Nabil Seyidov "Azərbaycanda uşaq müdafiə sisteminin islahatında alternativ qayğı xidmətləri olan himayədar qayğı və kiçik qrup evi xidmətlərinin əhəmiyyəti", "Hilfsverk Avstriya" beynəlxalq təşkilatının Qafqaz və Orta Asiya üzrə koordinatoru Brigita Ştöpler "Himayədar qayğı kimi alternativ xidmətlərin göstərilməsində Avstriya təcrübəsi" və "Hilfsverk Avstriya" beynəlxalq təşkilatının Azərbaycandakı nümayəndəliyinin rəhbəri Aytəkin Hüseynli "Əzizbəyov rayonunda müdafiəyə möhtac olan uşaqların ehtiyaclarının müəyyən edilməsi məqsədilə  keçirilən  sorğunun  nəticələri"  mövzusunda  təqdimatlarla  çıxış  etdilər.  Sonda  təqdim olunan məruzələrlə bağlı müzakirə aparıldı.

Hicran ƏKBƏROVA