Aprelin 28-də görkəmli oftalmoloq-alim, akademik Zərifə xanım Əliyevanın anadan olmasının 87-ci ildönümü ilə bağlı onun adını daşıyan məktəbdə tədbir keçirilmişdir.

Əvvəlcə təhsil müəssisəsinin kollektivi Fəxri xiyabana gələrək akademik Zərifə xanım Əliyevanın məzarını ziyarət etmiş, əziz xatirəsini anmışdır.

Mərasimdə məktəbin direktoru Məhəbbət Vəliyeva çıxış edərək akademik Zərifə xanım Əliyevanın zəngin elmi irsi, oftalmologiyanın müxtəlif sahələri üzrə apardığı tədqiqatlar, qazandığı nailiyyətlərdən danışmış, onun əziz xatirəsinin əbədiyaşar olduğunu söyləmişdir.

Akademik Zərifə xanım Əliyevanın fəxri adlarını, mükafatlarını xatırladan natiq bu adlar sırasında ən şərəflisinin vəfalı ömür-gün yoldaşı, sədaqətli dost və etibarlı silahdaş və ən əsası isə qayğıkeş ana adı olduğunu vurğulamışdır. O, Prezident İlham Əliyevin xeyir-duası ilə istifadəyə verilən akademik Zərifə Əliyeva adına məktəbin nümunəvi təhsil ocağına çevrildiyini söyləmişdir.

Tədbir iştirakçıları akademik Zərifə Əliyeva adına məktəbin fəaliyyətindən bəhs edən filmə baxmışlar.  

AzərTAc