1996-cı ildə Azərbaycan Respublikası Ədliyyə Nazirliyində dövlət qeydiyyatına alınmış, 2002-ci ildə Rusiya Federasiyası Elm və Təhsil  Nazirliyi tərəfindən lisenziyalaşdırılmış (2007-ci ildə təkrar lisenziyalaşdırılmışdır) Moskva Dövlət Açıq Universitetinin Bakı filialının fəaliyyətinə Azərbaycan Respublikası Təhsil Nazirliyi tərəfindən 19.11.2007-ci il tarixli, 031973 N-li xüsusi razılıq (lisenziya) verilmişdir.

Azərbaycan Respublikası Prezidentinin 02 sentyabr 2002-ci il tarixli, 782 N-li fərmanı ilə təsdiq olunmuş "Azərbaycan Respublikasında bəzi fəaliyyət növlərinə xüsusi razılıq (lisenziya) verilməsi haqqında Qaydalar"ın IV bəndinə və Təhsil Nazirliyinin 30.12.2002-ci il tarixli 1226 N-li əmrinə uyğun olaraq təhsil müəssisələrində mütəmadi olaraq lisenziya tələblərinə və şərtlərinə riayət olunması vəziyyəti araşdırılmalıdır. Buna uyğun olaraq Təhsil Nazirliyinin 08.04.2010-cu il tarixli 398 N-li əmri ilə Moskva Dövlət Açıq Universitetinin Bakı filialında lisenziya tələblərinə və şərtlərinə riayət olunması, eləcə də filialda tədris prosesinin təşkili vəziyyətini araşdırmaq məqsədi ilə İşçi qrupu yaradılmışdır.

İşçi qrupu tərəfindən aparılan araşdırmalar zamanı lisenziya verilən vaxtdan sonra MDAU-nun Bakı filialının maddi-texniki bazasının və tədris-metodiki təminatının inkişaf etdirilmədiyi, əksinə, daha da zəiflədiyi, filialda tədris prosesinin təşkili, o cümlədən fənlərin proqramlara və dərs cədvəlinə uyğun tədrisi, kafedraların işinin təşkili, elmi-pedaqoji kadrların seçilib yerləşdirilməsi və dərs yükünün planlaşdırılması, sənədləşmə işinin aparılması, tədris qrupları və birləşmələrin komplektləşdirilməsi və s. tədris-təşkilati məsələlərdə ciddi pozuntulara yol verildiyi, mövcud normativ sənədlərin tələblərinə əməl edilmədiyi aşkar olunmuşdur. Qeyd olunan pozuntu və çatışmazlıqlar İşçi qrupunun arayışında geniş şəkildə əks olunmuşdur.

İşçi qrupunun arayışı Təhsil Nazirliyi Lisenziya Komissiyasının 24.04.2010-cu il tarixli iclasında filial rəhbərliyinin iştirakı ilə müzakirə olunmuşdur. Lisenziya Komissiyasının yekdil qərarı ilə Azərbaycan Respublikası Təhsil Nazirliyi tərəfindən Moskva Dövlət Açıq Universitetinin Bakı filialının fəaliyyətinə verilmiş 19.11.2007-ci il tarixli, 031973 N-li xüsusi razılığın (lisenziya) ləğv olunması barədə qərar qəbul olunmuşdur. Qeyd olunanları nəzərə alaraq  

ƏMR EDİRƏM: 

1. Təhsil Nazirliyinin 08.04.2010-cu il tarixli 398 N-li əmri ilə yaradılmış İşçi  qrupunun arayışı və Lisenziya Komissiyasının 24.04.2010-cu il tarixli iclasının qərarı nəzərə alınsın.

2. Cari tədris ilinin başa çatmasına az müddət qaldığını nəzərə alaraq, tələbələrin təhsil hüquqlarını, imtahan-məqbul sessiyaları və buraxılış yekun attestasiyasının başa çatdırılmasını, cari ildə filialı bitirəcək məzunlara Rusiya Federasiyası  Elm və Təhsil Nazirliyi tərəfindən diplomların verilməsini təmin etmək məqsədi ilə Azərbaycan Respublikası Təhsil Nazirliyinin Moskva Dövlət Açıq Universitetinin Bakı filialının fəaliyyətinə verdiyi 19.11.2007-ci il tarixli, 031973 N-li lisenziya 01.09.2010-cu il tarixdən ləğv olunsun.

3. MDAU-nun Bakı filialına (M.Salahov) tapşırılsın:

3.1. 01.09.2010-cu il tarixə qədər tələbə qəbulunun aparılması, tələbələrin bərpa və köçürülməsi halları istisna olmaqla qanunvericiliyə uyğun tədrisin təşkilini (imtahan-məqbul sessiyasının, buraxılış yekun dövlət attestasiyasının təşkili, məzunlara diplomların verilməsi və s.) təmin etsin.

3.2. 01.09.2010-cu il tarixə qədər filialda təhsil alan, təhsili başa çatan, hazırda müxtəlif səbəblərdən təhsilində fasilə yaranan şəxslər barədə məlumatı və onların qiymət kitabçalarından çıxarışları Təhsil Nazirliyinə təqdim etsin.

4. Akkreditasiya şöbəsi (H.Zərbəliyev) və Hüquq sektoru (E.Həsənov) "Azərbaycan Respublikasında bəzi fəaliyyət növlərinə xüsusi razılıq (lisenziya) verilməsi haqqında Qaydalar"ın 5.5 bəndinə uyğun olaraq 3 gün müddətində Azərbaycan Respublikası Təhsil Nazirliyi tərəfindən Moskva Dövlət Açıq Universitetinin Bakı filialının fəaliyyətinə verilən 19.11.2007-ci il tarixli, 031973 N-li lisenziyanın ləğv olunması barədə onun sahibinə, dövlət vergi xidməti orqanlarına, Ədliyyə Nazirliyinə, Rusiya Federasiyası Elm və Təhsil Nazirliyinin Elm və Təhsil Sahəsinə nəzarət üzrə Federal Xidmətə və Moskva Dövlət Açıq Universitetinin rəhbərliyinə məlumat hazırlasınlar.

5. Təhsil Nazirliyi Aparatı (İ.Pirməmmədov) və Ali və orta ixtisas təhsili şöbəsi (İ.Mustafayev) mövcud qanunvericiliyin tələbləri gözlənilməklə bu filiala qəbul olunub hazırda təhsil alan və ya təhsili müəyyən səbəblərdən yarımçıq qalmış tələbələrin gələcək təhsilləri ilə bağlı təkliflər hazırlasınlar.

6. Nazirliyin müvafiq şöbələri bu əmrdən irəli gələn digər tədbirləri həyata keçirsinlər.

7. Əmrin icrasına nəzarəti öz üzərimə götürürəm. 

Misir MƏRDANOV,
Azərbaycan Respublikasının
təhsil naziri
27 aprel 2010-cu il