Aprelin 24-də Bakıdakı 164 nömrəli orta məktəbdə "Kimlik" şagird studiyasının və məktəbin kollektivinin hazırladığı "Xatun" adlı bədii-musiqili məclis keçirildi.

Görkəmli oftalmoloq-alim, akademik  Zərifə xanım Əliyevanın xatirəsinə həsr olunmuş tədbirin keçirilməsində məqsəq türk xatunlarının Azərbaycan tarixində rolunu  və onların xalqımıza verdiyi töhfələri gənc nəslə çatdırmaq idi. Mərasimdə məktəbin  müəllim-şagird kollektivi, aktyor-müğənni Şəmistan Əlizamanlı, şair Nizami Muradoğlu, rəssam Minayə Feyzullayeva və digər qonaqlar iştirak edirdilər.

Məclisi giriş sözü ilə açan məktəbin direktoru Kəmalə Qədirova qonaqları salamlayaraq, belə tədbirlərin keçirilməsinin vacibliyini vurğuladı. O belə mərasimlərin şagirdlərin təlim-tərbiyəsinə müsbət təsir göstərdiyini və onların şəxsiyyət kimi formalaşmasına xidmət etdiyini bildirdi. Qeyd etdi ki, kollektiv və xüsusən də "Kimlik" şagird studiyasının rəhbəri Şəhla Gündüzün səyi nəticəsində  artıq sayca dördüncü məclis keçirilir.

Çıxışlarda Azərbaycan qadınlarının elm və mədəniyyətimizin inkişafındakı xidmətlərindən ətraflı bəhs edildi.

Məktəbin xor kollektivi "Bu mənim ana dilimdir", "Qız haralısan", "Şuşanın dağları" və başqa mahnıları səsləndirdilər. Tədbirdə şagirdlər tərəfindən "Ağabəyim ağanın monoloqu" söylənildi, "Qaçqın qızın hekayəti", "Anama məktub" adlı kiçik səhnəciklər məharətlə oynanıldı.

Niyazi RƏHİMOV