Bakıdakı 164 nömrəli orta məktəbdə  "Qadın və  Bahar" mövzusunda ədəbi-bədii  kompozisiya keçirildi. Tədbiri  giriş sözü ilə açan məktəbin ingilis dili müəllimi  Gülsüm Axundova qadın və bahar haqqında, füsunkar bahara bənzəyən bu müqəddəs varlığın zərifliyindən və təbiətdən söz açdı. Aparıcılar Tural, Aydan, Fikrət müdriklərin ana haqqında söylədikləri  kəlamları  xatırlatdılar. Altıncılar C.Cabbarlının "Ana" şeirini ingilis dilində söylədilər. Sonra şagirdlərin ifasında ana ilə təbiətin  müqayisəsini, ananın təbiət qədər gözəl və zərif olduğunu göstərən kompozisiya nümayiş olundu. Ekranda göstərilən kliplər, səhnəciklər  alqışlarla qarşılandı.

Tədbirdə  çıxış  edənlər   müstəqil  dövlətimizin  fəal qurucularından olan  qadınlarımızın fədakarlığından, ümumxalq məhəbbəti  qazanmış Heydər Əliyev Fondunun prezidenti, millət vəkili Mehriban xanım Əliyevanın şəxsində  çağdaş Azərbaycan qadınının ucalığından söz açdılar.

Sonda  məktəbin direktoru Kəmalə Qədirova  iştirakçılara bahar təravəti, bahar ovqatı arzuladı. Bahar, qadın və ana gözəlliyinin tükənməzliyindən bəhs etdi. İngilis dili müəllimləri Gülsüm Axundova və Samirə  Əzizovanın təşkilatçılığı ilə  hazırlanan tədbiri çox yüksək dəyərləndirdi, onlara dərin təşəkkürünü bildirdi.

Sifai SƏFƏROVA