Azərbaycan Respublikasında dövlət qayğısı nəticəsində bir sıra idman növləri üzrə yüksək nailiyyətlər əldə olunmuşdur. Son illərdə, xüsusilə də "Azərbaycan Respublikasında Futbolun inkişafına dair Dövlət Proqramı (2005-2015-ci illər)"nın təsdiq edilməsi haqqında Azərbaycan Respublikası Prezidentinin Sərəncamının icrası ilə əlaqədar futbola da dövlət qayğısı artırılmış, onun maddi-texniki bazası inkişaf etdirilmiş, əhalinin elmi-metodiki və normativ-hüquqi bazasının yaradılması və təkmilləşdirilməsi istiqamətində mühüm addımlar atılmışdır.

Bakı Şəhəri üzrə Təhsil İdarəsinin tabeliyində fəaliyyət göstərən idman məktəblərində də bununla bağlı bir sıra işlər görülmüşdür. Yeni futbol bölmələri açılmış,  qrupların və gənc futbolçuların sayı xeyli artmışdır. İdman məktəblərində artıq qızlardan ibarət futbol komandaları da var. Komandaların yüksək səviyyədə hazırlığı keçirilən yarışlarda onların müvəffəqiyyətli iştirakına zəmin yaratmışdır. Belə ki, "Vətən" Respublika İxtisaslaşdırılmış Olimpiya Ehtiyatları Uşaq-Gənclər Futbol Məktəbinin bazasında Beynəlxalq Qadınlar Günü münasibətilə keçirilən  respublika açıq turnirində də məhz Bakı futbolçuları yarışın ən yüksək pilləsinə yiyələnmişlər.

Bakı şəhəri 9 nömrəli Uşaq-Gənclər İdman Məktəbinin qızlardan ibarət futbol komandası digər rəqibləri geridə qoyaraq I yerə layiq görülmüş, turnirin diplomu və kuboku ilə mükafatlandırılmışdır.

Bakı şəhəri 9 nömrəli Uşaq-Gənclər İdman Məktəbinin yetirmələri daha bir qələbə qazanmışlar. Məktəbin 11-16 və 11-18 yaş qrupunda olan iki basketbol komandası Azərbaycan Basketbol Federasiyasının keçirdiyi 2009-2010-cu illər mövsümündə Uşaq-Yeniyetmə Basketbol Liqasının V Çempionatında II yerin diplomuna layiq görülmüşlər.  

Sifai SƏFƏROVA