Hacıqabul rayonunda "Regionlarda informasiya mədəniyyətinin formalaşdırılması" mövzusunda "dəyirmi masa" keçirilib.

Rayon təhsil şöbəsinin müdiri Ş.Məmmədov "dəyirmi masa"nı açaraq qeyd edib ki, müasir dövrün tələblərinə uyğun olaraq təhsil işçiləri texnologiyalarla işləmək bacarıqlarına yaxşı yiyələnməli, daim öz biliyini inkişaf etdirməli və öz təcrübələrini təkmilləşdirmək məqsədilə öyrəndikləri yeni anlayış və bacarıqları siniflərdə tətbiq etməlidirlər.

Təhsil Nazirliyi Təhsil Sisteminin İnformasiyalaşdırılması İdarəsinin və "Mədəd" HTİB-nin təlimçisi, Hacıqabul şəhər 1 nömrəli orta məktəbin biologiya müəllimi Səbinə Rəsulova təhsilə İKT-nin tətbiqi ilə bağlı dövlət proqramlarından söz açaraq, rayonda bu sahədə müəllimlərin təlimlərdə fəal iştirakı barədə danışıb. Elektron məktəblərlə, eləcə də İKT-nin tətbiqi ilə bağlı rayonun təhsil müəssisələri üzrə fəaliyyət planı barədə məlumat verilib.

Sonra müzakirələrdə şəhər 5 nömrəli orta məktəbin direktoru G.Almazova çıxış edərək rəhbərlik etdiyi məktəbdə bu sahədə görülən işlərdən, keçirilən tədbirlərdə İKT-nin tətbiqindən danışıb, dərslərində İKT-ni yüksək səviyyədə tətbiq etməyi bacaran biologiya müəllimləri M.Səmədovanın, A.Yaqubovanın, kimya müəllimi Ş.Rəhmanovanın, alman dili müəllimi A.Gözəlovanın, ibtidai sinif müəllimləri S.Həşimova və D.Nəzirovanın adlarını söyləyib, belə dərslərin əhəmiyyətini xüsusi qeyd edib.

"Dəyirmi masa"da çıxış edənlər İKT-dən dərslərdə istifadənin əhəmiyyətindən, elektron dərsliklərin üstünlüklərindən danışıblar və belə imkanı yaratdıqları üçün ölkə rəhbərliyinə, Təhsil Nazirliyinə minnətdarlıqlarını bildiriblər.

Tədbirin sonunda bildirilib ki, yaxın günlərdə rayonun ümumtəhsil məktəblərində İKT-dən istifadə edən müəllimlərin dərslərindən ibarət "Nümunəvi dərs günləri" təşkil olunacaq. 

Nizami MİRZƏ