Bu günlərdə  "Zəngi" liseyinin və 17 nömrəli orta məktəbin ibtidai sinif müəllimləri  Rəna  Quliyeva və  Məhsəti Rəhimovanın birgə hazırladıqları II sinif üçün Azərbaycan dilindən testlər kitabçası  (Məsləhətçi: Təranə Hacıyeva, Təhsil Nazirliyinin Monitorinq və qiymətləndirmə şöbəsinin müdiri, filologiya elmləri doktoru) Təhsil Nazirliyinin müvafiq əmri  ilə əlavə vəsait kimi təsdiq edilərək "Didaktika" nəşriyyatı tərəfindən  çap edilib.

Kitabçada dərs ilinin ikinci yarısı üçün II sinifdə Azərbaycan dilindən  formativ (F) və kiçik summativ (S) qiymətləndirmələrin aparılması üçün test tapşırıqları verilib. Bu, hər bir şagirdin inkişafını izləməkdə, bölmələrin sonunda qazanılan bilik və bacarıqların səviyyəsini müəyyən etməkdə müəllimə  kömək məqsədi daşıyır.

Hər bir şagirdin fərdi istifadəsi üçün olan bu kitabçalar fənn  müəlliminin nəzarəti altında məktəbdə saxlanılır və yalnız dərs prosesində müəyyən müddətə tapşırıqların yerinə yetirilməsi üçün şagirdlərin istifadəsinə verilir. Formativ qiymətləndirmə tapşırıqlarının yerinə yetirilməsinə 12-15 dəqiqə, kiçik summativ qiymətləndirmə tapşırıqlarının yerinə yetirilməsinə isə 20-25 dəqiqə vaxtın ayrılması nəzərdə tutulur. Kitabça şagird portfoliosunun elementidir, valideynlər istədiyi vaxt bununla tanış ola bilərlər.  

Şakir CƏFƏROV