Martın 16-da Azərbaycan Dillər Universitetinin (ADU) kollektivi Xətai rayonundakı "N" saylı hərbi hissədə qulluq edən əsgər və zabitlərin görüşünə gəlmişdir.

ADU-nun rektoru, Milli Məclisin Beynəlxalq münasibətlər və parlamentlərarası əlaqələr komitəsinin sədri, professor Səməd Seyidov əsgər və zabitləri Novruz bayramı münasibətilə təbrik etmişdir. O, bu hərbi hissəni Xətai rayonundan seçilmiş Milli Məclisin deputatı olaraq öz doğma evi kimi qəbul etdiyini bildirmişdir. Prezident İlham Əliyevin hər bir çıxışında əsgərə, ordumuza xüsusi münasibət bəsləndiyini söyləyən Səməd Seyidov demişdir ki, ordu xalqın bir hissəsidir. Orduda xidmət edən bizim öz balalarımız, özümüzün yetişdirdiyimiz gənclərdir.

Xalqımızın ümummilli lideri Heydər Əliyevin uzaqgörən siyasətini bu gün uğurla həyata keçirən Prezident İlham Əliyevin Azərbaycanın beynəlxalq imicini gündən-günə yüksəltdiyini bildirən Səməd Seyidov ölkəmizin regionda ən güclü və nüfuzlu dövlət olduğunu vurğulamışdır. Demişdir ki, Azərbaycanda ordu quruculuğu sahəsində həyata keçirilən tədbirlər nəticəsində silahlı qüvvələrimiz Cənubi Qafqazın ən güclü və modern ordusuna çevrilmişdir.

Müharibənin yalnız səngərlərdə deyil, düşüncədə, mövqedə aparılmasının vacibliyini bildirən rektor Ermənistan-Azərbaycan, Dağlıq Qarabağ münaqişəsi ilə bağlı əsl həqiqətlərin dünya ictimaiyyətinə çatdırılmasında diplomatiyamızın uğurlarından bəhs etmiş, xalqımızın öz torpaqlarını azad edəcəyinə inandığını bildirmişdir. S.Seyidov torpaqlarımız azad olunandan sonra milli bayramı Qarabağda qeyd edəcəyimizə əminliyini ifadə etmişdir.

Sonra Azərbaycan Respublikası müharibə, əmək, silahlı qüvvələr və hüquq-mühafizə orqanları Veteranlar Şurasının məsul işçisi İslam Əfəndiyev İkinci Dünya müharibəsi zamanı iki dəfə Sovet İttifaqı Qəhrəmanı olmuş, görkəmli sərkərdə və cəsur Azərbaycan oğlu Həzi Aslanovun geyimlərinin fotolarından ibarət stend-tablonu hərbi hissəyə hədiyyə etmişdir.

Universitetin tərbiyə işləri üzrə prorektoru Ələddin Əliyev, ADU-nun Həmkarlar İttifaqı Komitəsinin sədri Misgər Məmmədov, Fəlsəfə kafedrasının professoru Məhəmməd Teymurlu və tələbələr öz ürək sözlərini və təbriklərini hərbi hissənin əsgər və zabit heyətinə çatdırmışlar.

Sonda ADU-nun Novruz sovqatı əsgərlərə paylanmışdır.

Qeyd edək ki, bu günlərdə ADU-nun Həmkarlar İttifaqı Komitəsinin təşkilatçılığı ilə universitetin bir qrup professor-müəllim heyəti və tələbələri bayram münasibətilə Füzuli rayonundakı "N" saylı hərbi hissədə Vətənimizin keşiyində mərd dayanan əsgərlərimizin bayramını təbrik etmiş, onlara Novruz sovqatı çatdırmışlar.  

AzərTAc