Bakıdakı 177 nömrəli orta ümumtəhsil məktəbində artıq bir neçə ildir ki, xalqımızın ən əziz bayramı Novruz böyük təntənə ilə qeyd olunur. Builki bayram şənliyi də çox məzmunlu və maraqlı təşkil olunmuşdu. Məktəblilərin yaz tətili Novruzdan bir neçə gün əvvəl başlandığından bayram şənliyi ilaxır çərşənbəyə salınmışdı. Ona görə şənliyə toplaşanlar həmin gün iki bayramın sevincini yaşadılar.

Məktəbin həyətində təşkil olunmuş, orijinal forması və maraqlı məzmunu ilə  diqqəti cəlb edən bayram tədbirinə Yeni Azərbaycan Partiyası Nərimanov rayon təşkilatının Qadınlar Şurası da təşkilatçı qismində qatılmışdı. Şənlikdə məktəbin pedaqoji və şagird heyətinin üzvləri ilə yanaşı, Təhsil Nazirliyindən, Nərimanov Rayon İcra Hakimiyyətindən, Bakı Şəhəri üzrə Təhsil İdarəsindən, rayon Qadınlar Şurasından da xeyli qonaq, habelə valideynlər vardı. Meydanda dairəvi düzülmüş stolların üstünə növbənöv bayram şirniyyatı, səmənilər qoyulmuşdu. Meydanın ortasında bayram tonqalı alovlanırdı.

Mərasimi 177 nömrəli məktəbin direktoru Həqiqə Məmmədova açaraq şənlik iştirakçılarının bayramını  təbrik etdi. Bildirdi ki, elimizin, obamızın gözəl adətləri var. Onları yaşatmaq, nəsillərdən-nəsillərə ötürmək bizim borcumuzdur. H.Məmmədova ilaxır çərşənbə, Novruzla bağlı xalqımız arasında yüz illərlə yaşayan ənənələrdən söz açıb, bayram günlərində küsülülərin barışdığını, qızlara, gəlinlərə xonça gəldiyini, hamının bir-biri ilə xoş rəftar etdiyini, bir-birinə qonaq getdiyini, məhz buna görə də bu milli bayramın xalqımız arasında çox sevildiyini bildirdi və qonaqları təqdim etdi.

YAP Respublika Qadınlar Şurasının sədr müavini, YAP Nərimanov Rayon Təşkilatı Qadınlar Şurasının sədri Məhəbbət İbrahimova  da söz alıb təmsil etdiyi qurum adından bayram sevinci yaşamağa gələnləri təbrik etdi,  onlara həmişə bayram əhvali-ruhiyyəli günlər arzuladı.

Sonra məktəbin istedadlı uşaqlarının ifasında bədii proqram nümayiş olundu. Proqramın bütün nömrələri, xüsusən də bahar qızın meydana gəlişi, təmsil etdiyi fəsilin şəninə söylədiyi şeir və mahnılar, keçəllə-kosanın məzəli dialoqu, ayrı-ayrı şagirdlərin ifaları, idman nömrələri bayram iştirakçılarında xoş ovqat yaratdı.

Tədbirin sonunda şagirdlər və qonaqlar bayram tonqalının ətrafında yallı getdilər. 

Yusif ƏLİYEV