Türkiyənin İstanbul şəhərində Böyük Britaniyanın "British Council" təşkilatının "Uğura doğru addımlar" layihəsi ilə əlaqədar beynəlxalq seminar keçirilmişdir.

Təhsil Nazirliyindən bildirmişlər ki, "British Council" təşkilatı tərəfindən təşkil edilən, Türkiyə, Rusiya, Ukrayna, Gürcüstan, İsrail, Bolqarıstan və digər ölkələrdən olan nümayəndələrin qatıldığı həmin seminarda Azərbaycan Respublikası Təhsil Nazirliyinin Strateji təhlil, planlaşdırma və kadrların idarəolunması şöbəsinin müdiri Fərzəli Qədirov və Azərbaycan Dillər Universitetinin Təlimdə innovasiyalar və əlavə təhsil kafedrasının müdiri Əmralı Şirəliyev iştirak etmişlər.

Beynəlxalq tədbirdə hər bir ölkənin nümayəndə heyəti təqdimatla çıxış etmiş, ingilis dili müəllimlərinin ilkin hazırlığı, statusu, ixtisasının artırılması sistemi barədə məlumat verilmişdir.

Azərbaycan nümayəndələrinin təqdimatında son illərdə ingilis dili müəllimlərinin peşəkarlığının artırılması istiqamətində həyata keçirilən tədbirlər, o cümlədən "British Council" təşkilatı ilə birgə layihələr, səmərəli əməkdaşlıq nəticəsində əldə olunan əhəmiyyətli nailiyyətlər, eyni zamanda ingilis dili müəllimlərinin ilkin hazırlığı barədə məlumat verilmişdir.

Ölkəmizdə ingilis dilinin tədrisi ilə əlaqədar həyata keçirilən tədbirlər və tətbiq edilən yeni ixtisasartırma modeli "British Council"in mütəxəssisləri və seminar iştirakçıları tərəfindən maraqla qarşılanmışdır.

Beynəlxalq tədbirdə "British Council"in "Uğura doğru addımlar" adlı yeni layihəsi barədə məlumat verilmişdir.

"British Council" təşkilatı ilə birgə həyata keçiriləcək yeni layihə Azərbaycan üçün xüsusi əhəmiyyət daşıyır. Bu layihə pedaqojiprofilli ali təhsil müəssisələrində ingilis dili müəllimi ixtisası üzrə təhsil alan 900 nəfərədək sonuncu kurs tələbəsini, hazırda məktəblərdə çalışan və 5 ilədək pedaqoji stajı olan 1000 nəfərədək ingilis dili müəllimini əhatə edəcəkdir.  

AzərTAc