Albert Eynşteyn fikirli halda küçədə bir dostu ilə rastlaşır və onu evinə qonaq çağırır:

-Axşam bizə gələrsiniz, professor Stimson da bizdə olacaq.

- Elə Stimson mən özüməm də!?-deyə dostu təəccüblənir.

- Bunun fərqi yoxdur, hər halda gəlin.

Kimyaçı alim Aleksandr Butlerov cavanlıqda qeyri-adi fiziki gücə malik olub. Bir dəfə öz dostunun yanına gələn alim evdə heç kimi tapmır. Otaq peçinin yanında od qarışdırmaq üçün olan qalın dəmiri "B" hərfi kimi əyib çıxıb gedir.

Əlbəttə, Butlerovun dostu kimin gəldiyini dərhal başa düşür...

Kibernetikanın atası sayılan Robert Viner özünün huşsuzluğu ilə məhşur imiş. Ailəsi yeni mənzilə köçərkən onun həyat yoldaşı təzə evin ünvanı yazılmış vərəqi onun cibinə qoyur. Xanım gözəl bilirdi ki, başqa cür onun əri evi tapa bilməyəcək. Lakin buna baxmayaraq, elə birinci gün işdə ağlına yaxşı bir ideya gələn Viner, cibindəki həmin kağızın üzərinə tez-tələsik nəsə cızma-qara edir və dərhal da yazdığı düsturların səhvini başa düşüb kağızı zibil yeşiyinə tullayır.

Axşam heç bir şey olmamış kimi özünün köhnə ünvanına yollanan alim evdə artıq heç kimin yaşamadığını görərkən özünü itirmiş halda küçəyə çıxır. Birdən özünə gəlib yaxınlıqda dayanmış bir qıza yaxınlaşıb deyir:"Bağışlayın, yəqin siz məni tanıyırsınız. Mən professor Vinerəm və mənim ailəm bu yaxınlarda buradan köçmüşdür. Siz deyə bilməzsiniz ki, hara köçüblər?".Qız ona diqqətlə qulaq asdıqdan sonra cavab verir:"Doğrudur, atacan, anam da elə bilirdi ki, sən unudacaqsan və məni bura sənin dalınca göndərdi".

İngilis alimi Çarlz Darvini onun şərəfinə verilən nahara dəvət edirlər. Onun yanında əyləşən  qəşəng, gənc bir qadın soruşur:

- Cənab Darvin, siz iddia edirsiniz ki, insan meymundan əmələ gəlib. Bu fikir mənə də aiddir?

-Əlbəttə, amma siz adi meymundan yox, çox cazibədar və qəşəng meymundan əmələ gəlmisiniz.

Dahi fizik-alim Henri Hers uşaqlıqda bütün fənlərdən yüksək biliyə malik idi: həm ədəbiyyat, həm dilləri öyrənməkdə gözəl nailiyyətlər əldə edən Hers tokar dəzgahında da məharət nümayiş etdirirmiş. Çox illər sonra onun tokar işi üzrə müəllimi  dünya şöhrəti qazanan alim haqqında eşidərkən təəssüflə bildirir: "Çox heyif, o uşaqdan əla tokar çıxardı".

Bir dəfə məşhur ingilis fiziki Rezerford axşam vaxtı öz laboratoriyasına gəlir. Vaxtın gec olmasına baxmayaraq, onun tələbələrindən biri iş başında olur. O, soruşur:

- Bu vaxtı siz burada nə edirsiniz?

- İşləyirəm.

- Bəs gündüz nə edirsiniz?

- Əlbəttə ki, işləyirəm.

- Səhər tezdən də işləyirsiniz?

- Bəli, professor, səhərlər də işləyirəm,- deyə təriflənəcəyini gözləyən şagird razı halda cavab verir.

Rezerford tutularaq gərginləşmiş halda soruşdu:

- Qulaq asın, bəs siz nə vaxt düşünürsünüz.

Məşhur danimarkalı fizik Nils Bor özünün kənddəki evinin kandarından nal asmışdı. El arasında deyilənə görə, nal xoşbəxtlik gətirir.

Onun qonaqlarından biri təəccüblə fizikdən soruşur:

-Yəni sizin kimi dahi alim doğrudanmı qapı üstündən asılmış nalın xoşbəxtlik gətirdiyinə inanırsınız?

- Eh, - Bor dərindən nəfəs alaraq, - əlbəttə inanmıram... Qəribəsi odur ki, nal ona inanmayanlara da xoşbəxtlik gətirir.

Kimyaçı və bəstəkar Aleksandr Borodin çox dağınıq fikirli adam imiş. Bir gün o, dostlarını evinə qonaq çağırır. Məclisin ən qızğın vaxtı birdən Borodin ayağa qalxır, tez gedib paltosunu geyir və sağollaşıb çıxmağa hazırlaşır ki, qonaqlar soruşurlar:

- Hara belə, Aleksandr Porfiryeviç?

-Sağlıqla qalın, mənim vaxtım yoxdur, evdə olmalıyam. Səhər mühazirəm var.

Yalnız şaqqanaqla gülən dostlarını gördükdə Borodin başa düşür ki, o, öz evindəymiş.