Azərbaycan Respublikası Dövlət Neft Şirkəti (ARDNŞ) ilə Fransanın "Total" şirkəti arasında kadr hazırlığı sahəsində əməkdaşlıq çərçivəsində Paris Neft İnstitutunun xarici tələbələr üzrə prorektoru, professor Jan Pyer Roan və "Total" şirkətinin kadr hazırlığı üzrə departament rəhbəri xanım Veronik Minyonak Bakıda səfərdə olmuşlar. Onlar ARDNŞ-ın Azərbaycandakı təqaüdçüləri sırasından seçilmiş 18 tələbə ilə müsahibə keçirmişlər.

ARDNŞ-ın mətbuat xidmətindən bildirmişlər ki, müsahibədə təqaüdçülər ixtisas və məntiqdən test imtahanları vermiş, qonaqlar onlarla sual-cavab aparmışlar. Seçilmiş 6 tələbənin ARDNŞ-ın Təqaüd Proqramı çərçivəsində Fransanın nüfuzlu ali təhsil müəssisələrində magistratura təhsili almağa göndərilməsi nəzərdə tutulur. Onların 3-ü mühəndis, digər 3 nəfəri isə iqtisadiyyat ixtisası üzrə təhsillərini davam etdirmək üçün Bakı turunu müvəffəqiyyətlə keçmişlər.

Martın 11-də fransalı qonaqlar ARDNŞ-ın baş ofisində şirkətin kadr, rejim və informasiya texnologiyaları üzrə vitse-prezidenti Xalik Məmmədovla görüşərək, müsahibənin yekunları haqqında ona məlumat vermişlər. X.Məmmədov kadr hazırlığı istiqamətində iki şirkət arasında yaranmış əməkdaşlığın qarşıdakı illərdə daha da dərinləşəcəyinə əminliyini diqqətə çatdırmışdır.

AzərTAc