Heydər Əliyev Fondu Gürcüstandakı azərbaycanlıların təhsilinə müntəzəm dəstək və yardım göstərir. İndiyədək azərbaycanlıların yığcam məskunlaşdığı Kvemo Kartli-Borçalı bölgəsində uzun illər təmir olunmamış bir neçə məktəb binası Fondun dəstəyi ilə əsaslı surətdə yenidən qurulub. Belə təhsil ocaqlarından biri də Marneuli şəhərindəki 7 nömrəli Azərbaycan ümumi məktəbidir.

Heydər Əliyev Fondunun dəstəyi ilə əsaslı surətdə bərpa olunmuş məktəbin martın 11-də açılış mərasimi keçirilib. Tədbiri Gürcüstan təhsil və elm naziri Dmitri Şaşkin açaraq, belə xeyirxah işə görə Heydər Əliyev Fonduna, onun prezidenti Mehriban xanım Əliyevaya təşəkkürünü bildirib. Nazir deyib ki, bu il Fondun yardımı ilə bölgədə üç məktəb binası əsaslı bərpa olunub. Azərbaycanlı tərəfdaşlarımız bu istiqamətdə işləri davam etdirmək niyyətindədirlər, biz onları alqışlayır, uğur diləyirik. D.Şaşkin əmin olduğunu bildirib ki, yaxşı şərait tədrisin və təlimin yüksək səviyyədə təşkilinə imkan yaradacaqdır.

Heydər Əliyev Fondunun icraçı direktoru Anar Ələkbərov Fondun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın xoş arzularını tədbir iştirakçılarına çatdırıb.

A.Ələkbərov müasir tələblərə uyğun təmir olunan məktəb binasının şagirdlərin elmin sirlərinə daha yaxşı yiyələnmələrinə imkan yaradacağına əmin olduğunu söyləyib. A.Ələkbərov bildirib ki, Heydər Əliyev Fondunun prezidenti Mehriban xanım Əliyevanın tapşırığına əsasən bölgədə daha bir neçə məktəb binasının yenidən qurulması, yeni məktəb binalarının inşası da planlaşdırılıb.

Gürcüstan parlamentinin deputatı Azər Süleymanov belə bir xeyirxah işə görə Gürcüstan azərbaycanlıları adından Azərbaycan Respublikasının rəhbərliyinə və Heydər Əliyev Fondunun prezidenti Mehriban xanım Əliyevaya minnətdarlığını bildirib.

Marneuli resurs-təhsil mərkəzinin rəhbəri Kamandar İsmayılov Fondun gürcüstanlı soydaşlarımıza qayğı və diqqəti əsirgəmədiyindən, məktəblərin təmirində, lazımi dərsliklə, avadanlıqla təmin olunmasında uğurlu fəaliyyətindən danışıb.

Marneulidəki 7 nömrəli ümumi məktəbin direktoru Vahid İbrahimov belə bir hədiyyəyə görə təhsil ocağının kollektivi adından Mehriban xanım Əliyevaya minnətdarlığını bildirib.

Tədbirdə Azərbaycanın Gürcüstandakı səfiri Namiq Əliyev, Kvemo Kartli-Borçalı bölgəsinin qubernatoru David Kirkitadze, Marneuli rayon rəhbərliyi iştirak ediblər.  

Y.ƏLİYEV