Həmsöhbətim Sabir Kamil oğlu Məmişov sadə bir həyat yolu keçib. 1953-cü ildə anadan olub. 1971-ci ildə orta məktəbi, 1975-ci ildə isə ali məktəbi bitirib. Ali məktəbi bitirdikdən sonra müə\llim kimi fəaliyyətə başlayıb. Azərbaycan Elmlər Akademiyasının Riyaziyyat İnstitutunda elmi işçi işləyib. 1990-cı ildən isə Yasamal rayonundakı 20 nömrəli məktəb-liseydə riyaziyyat  müəllimi kimi fəaliyyət göstərir. Bunun 3 ilini (2002-2005-ci il) direktor müavini işləmişdir. İş təcrübəsi dəfələrlə respublika mətbuatında, radio və televiziyada işıqlandırılmış, riyaziyyatdan apardığı "açıq dərs" "Mir" telekanalı vasitəsilə MDB ölkələrində nümayiş etdirilmişdir. Riyaziyyata aid çoxlu dərs vəsaitlərinin, riyaziyyat tədrisinin aktual problemləri, ayrı-ayrı mövzuların tədrisinə dair çoxsaylı məqalə və referatların müəllifidir. Azərbaycan müəllimlərinin XII və XIII qurultaylarının nümayəndəsi olmuşdur. Azərbaycan Respublikasının Prezidenti cənab İlham Əliyevin Sərəncamı ilə 2007-2008-ci tədris ilində keçirilmiş "Ən vaxşı müəllim" müsabiqəsinin qalibi olub.

Bahar özü ilə ailələrə, evlərə şadlıq, sevinc bəxş edir. Novruz bayramı ərəfəsində insanlar bir-birini təbrik edir, ürəklərdə sevinc yaşanır, bir-birlərinin evlərinə gedir, söhbətləşirlər. Biz də Novruz bayramı ərəfəsində Yasamal rayonundakı 20 nömrəli məktəb-liseyin qabaqcıl riyaziyyat müəllimi, respublikanın əməkdar müəllimi Sabir Məmişovla söhbət etdik.

Sabir müəllimi tapmaq o qədər də çətin olmadı. Birinci mərtəbədə oturmuş ahıl qapıçı bildirdi ki, dəhlizin axırındakı kabinet Sabir müəllimindir. Kabinetə daxil olduq. Sabir müəllim bizi görən kimi ayağa qalxdı və köhnə tanışlar kimi görüşüb hal-əhval tutduq:

- Sabir müəllim, Novruzqabağı özünüzü necə hiss edirsiniz?

- Lap yaxşı. Həmişə Novruz bayramında ikiqat sevinirəm. Düz 10 il bundan qabaq Novruz ərəfəsində ümummilli liderimiz Heydər Əliyevin Sərəncamı ilə "Azərbaycan Respublikasının əməkdar müəllimi" adına layiq görülmüşəm. Ona görə də hər dəfə Novruz gələndə daha çox sevinirəm.

- Sabir müəllim, ailə üzvləriniz neçə nəfərdən ibarətdir?

- Bir oğlum, iki qızım, üç nəvəm var. Həyat yoldaşım Nina Hüseynova evdar qadındır. Oğlum İqtisad Universitetini bitirib, Əhalinin Əmək və Sosial Müdafiəsi Nazirliyində işləyir. Qızım Səadət mənim yolumu  gedir, bir kollektivdə çalışırıq. Digər qızım Səbinə isə həkimdir. Övladlarımın üçü də ailə qurub.

- Düz  20 ildir ki, bu məktəbdə çalışırsınız. Hansı illəri daha çox uğurlu hesab edirsiniz?

- Doğrusu, bütün illər mənim üçün uğurlu olub. Lakin ötən il isə daha çox yetirmələrimin uğuruna sevinmişəm. Dərs dediyim şagirdlərin 57 nəfərindən 54-ü ali məktəbə, 3-ü isə orta ixtisas məktəbinə daxil olub. Şagirdlərimdən xarici ölkələrdə təhsil alanlar da çoxdur. ABŞ, Fransa, Almaniya, İngiltərənin ali məktəblərində təhsillərini davam etdirirlər. Onlar daim İnternet vasitəsilə mənimlə əlaqə saxlayır, bayramlarda təbrik edirlər.

- Dolanışığınız necədir, nə qədər əməkhaqqı alırsınız?

- Üçotaqlı evim var. Oğlumun ailəsi ilə birlikdə yaşayırıq. 350 manat əməkhaqqı alıram.

 - Bu məvacib sizi təmin edirmi?

- Desəm çatır, bu, səmimi olmaz. Yox, çatmır.

- Ailə büdcənizdə əsas nəyə daha çox pul xərcləyirsiniz?

- Əsasən ərzağa və gündəlik tələbat mallarına. Ət, yağ, meyvə daha çox yeyilir. Geyim şeylərinə də pul ayırırıq.

 - Sabir müəllim, repetitorluq edirsinizmi?

- Bəli. 20-yə yaxın şagirdim var. Onları ail məktəblərə hazırlaşdırıram. Bizdə bu işə qəribə baxırlar. Repetitorluq dünyanın bütün ölkələrində var. Hər bir vətəndaş əlavə bilgilər almaq üçün repetitora müraciət edir. Azərbaycanda bunun bir qədər ənənəvi hal almasının səbəbini valideynlərdə görürəm. Bəzi valideynlər övladlarının repetitor yanında hazırlaşması ilə "fəxr" edirlər. İkincisi, aşağı siniflərdən başlayaraq valideynlər məktəblə sıx əlaqə saxlamırlar. Məlumdur ki, orta məktəbi "3" və "4" qiymətlə bitirənlər həmin biliklə ali məktəbə qəbul ola bilməzlər. Övladları IX və X siniflərə çatdıqda valideynlərin yadına düşür ki, onlara təhsil lazımdır. Ona görə də övladlarını əlavə olaraq 4-5 fəndən repetitor yanına göndərirlər. Belə vaxtda onlar övladlarının sağlamlığı haqqında düşünmürlər. Həm gündəlik dərsə gəlmək, eyni gündə 3-4 repetitor yanına getmək şagirddə zehni yorğunluq yaradır. Bunun fəsadları isə bir neçə ildən sonra büruzə çıxır.

İndi məktəblərimizin əksəriyyətində yüksək təhsil almaq üçün hər cür şərait yaradılıb. Ölkə rəhbərliyinin təhsilə göstərdiyi diqqət və qayğı Azərbaycan məktəbinin gələcəyə doğru addımlamasına böyük təkan verir.

- Dərs dediyiniz şagirdlərdən hədiyyə almısınızmı?

- Səmimi deyirəm. Yox, almamışam. Cəmiyyətdə belə bir fikir var ki, indi hamı alır. Bu necə ola bilər ki, oğlum və qızım dediyin şagirdlərdən hədiyyə umasan?

- Novruz bayramını necə qarşılayırsınız? Bazarlıq etmisinizmi?

- Adətən bazarlığı oğlum Ramil edir. Azərbaycan adət və ənənələrinə uyğun bayram keçiririk. Artıq evdə paxlava, şəkərbura, qoğal bişirilib. Bayram axşamı da plov bişiriləcək, yanında bütün nemətləri ilə. Bayram şamı da almışıq.

- Sabir müəllim, xalqımıza nə arzulayardınız?

- Novruz bayramı münasibətilə bütün xalqımızı ürəkdən təbrik edirəm. Arzum budur ki, torpaqlarımız işğaldan azad olsun və biz belə bayramları Qarabağda keçirək. Müəllimlərimizə də xoşbəxtlik, səadət, çətin və şərəfli işlərində uğurlar arzulayıram.  

Söhbətləşdi:
Malik NOVRUZOV