Martın 18-də Azərbaycan Müəllimlər İnstitutunda "Taksonomiyalardan standartlara" mövzusunda tədbir keçirildi. Tədbir institutun Psixologiya kafedrasının müdiri, psixologiya elmləri namizədi Nurəngiz Rzayevanın  təşəbbüsü və təşkilatçılıgı ilə hazırlanmışdı.

Mərasimdə AMİ-nin rektoru, professor Aqiyə Naxçıvanlı, Təhsil Nazirliyinin şöbə müdiri Aydın Əhmədov,TPİ-nin direktoru Abdulla Mehrabov və ümumtəhsil məktəblərinin rəhbərləri və başqa qonaqlar iştirak edirdilər.

Tədbiri giriş sözü ilə açan AMİ-nin rektoru, professor A.Naxçıvanlı qonaqları salamlayaraq,müasir təhsil konsepsiyasında məqsədyönlü ideyaların həyata keçirilməsi istiqamətində prioritet  məsələlər haqqında danışdı.

O, müasir təhsilimizin mərhələli şəkildə inkişaf etdiyini bildirərək qeyd etdi ki, şəxsiyyətyönümlü və nəticəyönümlü təlim prosesində bu taksonomların əhəmiyyəti böyükdür.

Sonra taksonomiya haqqında ümumi məlumat verilərək onun mahiyyəti və nədən ibarət olduğu bir daha iştirakçıların nəzərinə çatdırıldı.

Tədbir Təhsil Nazirliyinin şöbə müdiri Aydın Əhmədovun çıxışı ilə davam etdirildi. O, taksonomiyanın yaranması və tarixi haqqında müəyyən fikirlər söyləyərək, belə mövzuda tədbirlərin tez-tez keçirilməsinin vacibliyini, təhsilimizin inkişafına, onun dünya təhsil sistemi ilə yaxınlaşmasına xidmət etdiyini vurğuladı.

 Digər çıxış edənlər də taksonomiya haqqında fikirlərini söyləyərək, tədbirin təşkilatçılarına minnətdarlıq etdilər.   

Niyazi RƏHİMOV