Baharın gəlişi münasibətilə Naxçıvan Özəl Universitetində bayram konserti keçirildi. Konsert başlanmazdan əvvəl universitetin tədris və elmi işlər üzrə prorektoru, dosent İbrahim Kazımbəyli çıxış edərək Novruz bayramı münasibətilə universitetin bütün müəllim və tələbə kollektivini təbrik etdi.

Qeyd olundu ki, bayramlar içində bir bayram var. Əziz, doğma, sevimli Novruz bayramı. Bu bayram gəlişi ilə evlərə, ailələrə yeni büsat, şadlıq və sevinc gətirir. Hamı çalışır ki, bu bayramı yüksək təntənə ilə qeyd etsin. Hər evdə, hər ailədə Novruz bayramına əvvəlcədən hazırlıq işləri aparılır. Şəkərbura, paxlava, şorqoğal bişirilir, bolluq və bərəkət rəmzi sayılan səməni qoyulur. Bayram axşamı el tonqal başına yığılır, küsülülər barışır, qohumlar, dostlar bir-birinin evinə təbrikə gedir. Novruza bir ay qalmış 4 çərşənbə qeyd edilir. Bu çərşənbələrin hər biri insanların yaşaması üçün, həyatın varlığı üçün vacib olan 4 ünsürdən birinə - od, torpaq, su və havaya həsr olunur. Bu da Novruzun ən qədim və ən müdrik bayramlardan biri olduğunu göstərir. Novruz şənlikləri sırasında ilin axır çərşənbəsi xüsusi yer tutur və təntənə ilə qeyd olunur. Bu zaman məhəllələrdə, xüsusən də kənd yerlərində uşaqlar və gənclər qapı-qapı gəzib bayram payı toplayır, müxtəlif oyunlar keçirirlər.

İbrahim Kazımbəyli qeyd etdi ki, bu bayramda əməl edilən adət və inamlar yenilik, saflıq, təmizlik, sağlamlıqla əlaqədardır. Axır çərşənbədə təzə paltar geyinmək uğur gətirər. Xalq arasında həmin gün ağlamaq, qara rəngli paltar geyinmək, bayramı evdə keçirməmək pis əlamət sayılır. Həmin gün bütün evlərdə plov qazanı asılır. Bu çərşənbə xalq arasında ilaxır adlanır. Xonçalarda boyanmış yumurtalar, səməni, müxtəlif növ şirniyyatlar bayramın əsas atributlarıdır. Axır çərşənbədən sonra Novruz gələr. Bu, torpağın oyandığı, təbiətin dirçəldiyi gündür, baharın gəlişidir. Prorektor bu əziz bayram münasibətilə universitetin bütün müəllim və tələbə kollektivini təbrik etdi və onlara gələcək fəaliyyətlərində uğurlar arzuladı.

Sonra geniş konsert proqramı başlandı. Konsert proqramında universitet tələbələrinin bir-birindən maraqlı musiqi nömrələri iştirakçılarda xoş əhvali-ruhiyyə yaratdı. 

Mina QASIMOVA,
Naxçıvan Özəl Universiteti
mətbuat xidmətinin rəhbəri