Bu günlərdə Azərbaycan Respublikası Prezidenti yanında Dövlət İdarəçilik Akademiyasında ixtisasartırma kursunun növbəti buraxılışı olub. "Təbiətdən istifadə və ətraf mühitin mühafizəsinin dövlət tənzimlənməsi" istiqaməti üzrə təşkil edilən kursun əsas məqsədi ekoloji islahatlara dair biliklərin sistemləşdirilməsi və bu məsələlərlə bağlı dinləyicilərə yeni məlumatların verilməsidir.

İcra hakimiyyəti orqanlarının, müvafiq nazirlik, komitə və idarələrin rəhbər işçilərinin iştirak etdiyi məşğələlərdə ulu öndər Heydər Əliyevin dövlət idarəçilik təcrübəsinin əhəmiyyətindən bəhs edilib, Azərbaycan Respublikasının təbii sərvətlərinin səmərəli istifadəsi, qlobal iqlim dəyişiklikləri, onun insan orqanizminə təsiri və s. məsələlərdən ətraflı söhbət açılıb.

Kursda ekologiya və təbii sərvətlər naziri Hüseynqulu Bağırov, Beynəlxalq EKO Enerji Akademiyasının prezidenti Fəqan Əliyev və digər tanınmış alim və mütəxəssislər təbiətdən istifadənin müasir problemlərinə dair müxtəlif mövzularda mühazirələr oxuyublar. DİA-nın rektoru, əməkdar elm xadimi, professor Seyfəddin Qəndilov kursu başa vuranları təbrik edərək onlara gələcək fəaliyyətlərində uğurlar arzulayıb. Dinləyicilərə sertifikatlar təqdim olunub. 

Hicran ƏKBƏROVA