Son vaxtlar paytaxtımızın ümumtəhsil sistemində faydalı bir təcrübə - ənənə yaranıb. Yeni fənn kurikulumlarının tətbiqi vəziyyəti ilə tanışlıq, bu sahədə toplanmış müsbət təcrübənin öyrənilib yayılması, yeni kurikulumlarla işləyən müəllimlərin fəaliyyətinin qiymətləndirilməsi məqsədi ilə ayrı-ayrı məktəblərdə vaxtaşırı olaraq "açıq dərs"lər keçirilir, onların təhlilinə həsr olunmuş müzakirələr aparılır.

Həmin silsilədən növbəti tədbir martın 11-də Bakıdakı 5 nömrəli orta məktəbdə təşkil olunmuşdu.

Məktəbin fənn kurikulumlarının tətbiqi ilə bağlı I-II siniflərində və III-IV siniflərdə "Fəal təlim metodlarından dərslərimizdə istifadə edirik" mövzusunda keçirilən "açıq dərs"lərə Təhsil Nazirliyindən, Təhsil Problemləri İnstitutundan, Azərbaycan Müəllimlər İnstitutundan, Bakı Pedaqoji Kadrların İxtisasartırma və Yenidənhazırlanma İnstitutundan, Bakı Şəhəri üzrə Təhsil İdarəsindən xeyli təhsil mütəxəssisi və ekspert dəvət olunmuşdu. Dərslərdə habelə müəllimlər və valideynlər də iştirak edirdilər.

Məktəbin I mərtəbəsindəki geniş dəhlizdə mövzu ilə bağlı zəngin mündəricəli sərgi təşkil edilmişdi. Öncə həmin sərgi ilə tanış olan tədbir iştirakçıları fənn kurikulumlarının strukturunu, müəllimlərin dərs icmallarını, hazırladıqları təlim resurslarını və s. materialları əks etdirən guşələri, fənn kurikulumlarının izahı, təbliği, müəllimlərin, valideynlərin maarifləndirilməsi istiqamətində görülmüş işləri yüksək qiymətləndirdilər.

Sonra məktəbin müəllimləri Xanım Məmmədovanın 1 "A" sinfində ingilis dilindən, Şofizə Mehdiyevanın I "B" sinfində texnologiyadan, Kəbutər Səfərovanın I "C" sinfində riyaziyyatdan, Fatimə Xəzri-Mirzəyevanın I "Ç" sinfində (rus bölməsi) həyat bilgisindən, Bəsti Şıxıyevanın II "A" sinfində Azərbaycan dilindən, Əsli Mütəllimovanın II "B" sinfində təsviri incəsənətdən, Sevinc Rzayevanın II "C" sinfində (rus bölməsi) informatikadan, Almaz Bayramovanın III "A" sinfində həyat bilgisindən, Rübabə Mazanovanın III "B" sinfində ana dilindən, Günel Musəvinin III "C" sinfində oxudan, Afaq Abdullayeva və Natəvan Abiyevanın III "Ç" sinfində (rus bölməsi) Azərbaycan dilindən, Təranə Ağalarovanın IV "A" sinfində həyati bacarıqlara əsaslanan təhsildən, Ceyran Cəlilovanın IV "C" sinfində təsviri incəsənətdən, Ceyranə Süleymanovanın IV "Ç" sinfində riyaziyyatdan dedikləri dərslər dinlənildi.

Biz müşahidələrimizi II "A" sinfində apardıq. Mövzu "Güllərdən göyçək Çiçək" idi. Sinif qruplara ayrılmış, onlara güllərin adları verilmişdi: "Qərənfil", "Bənövşə", "Lalə", "Qızılgül" və "Nərgiz". Mövzunun tədrisi üçün əqli hücum, müzakirə üsullarını seçmiş müəllim Bəsti Şıxıyeva kəpənəklərə dair suallarla motivasiya yaratdı. Kəpənəklərin güllərə-çiçəklərə qonduğu və onlara oxşadığı, nəticədə bütün canlıların düşmənlərindən qorunmaq üçün düşdüyü mühitə uyğunlaşdığı qeyd olundu. Təbiətdən buna çoxlu misallar gətirildi və müvafiq şəkillər nümayiş etdirildi. Sonra qruplardakı şagirdlər adlarını daşıdıqları güllər haqqında şeirlər söylədilər. Müvafiq əlaqəni yaradan müəllim mövzunu elan etdi, mətni özü bir dəfə oxuduqdan sonra şagirdlərə oxutdu, onun necə mənimsənildiyini yoxlamaq üçün suallar verdi. Suallar şagirdlər tərəfindən ətraflı cavablandırıldı. Sonra qruplara tapşırıq verildi. Tapşırıqları icra edən qrupların liderləri lövhəyə çıxıb öz cavablarını elan etdilər. Dərsdə qruplara adlarını daşıdıqları güllərin rəsmini çəkmək də təklif olundu və şagirdlər bu tapşırığı icra edəndən sonra qrupların işi qiymətləndirildi. Dərsin sonunda hər qrupun fəaliyyəti bir neçə parametr üzrə qiymətləndirildi və yekun qiymətlər çıxarıldı.

"Açıq dərs"lər başa çatdıqdan sonra "dəyirmi masa" ətrafında onların müzakirəsi aparıldı. Müzakirəni açan Təhsil Nazirliyinin Kənd rayonları üzrə ümumi təhsil şöbəsinin müdiri Aydın Əhmədov məktəbdə yeni kurikulumların tətbiqinə hazırlıq yönündə xeyli iş görüldüyünü, müəllimlərin əksəriyyətinin kurikulumların mahiyyətini düzgün dərk edib dərslərində bacarıqla reallaşdırdığını, yeni təlim modelinin müəllimləri də, şagirdləri də dəyişdirdiyini qeyd etdi. Dinlədiyi dərsə münasibət bildirən A.Əhmədov Fatimə Xəzri-Mirzəyevanın I "Ç" sinfində həyat bilgisindən apardığı dərsi çox uğurlu dərs adlandırıb onun bütün şagirdlərin fəallığı ilə keçdiyini, müəllimin şagirdlərə tam sərbəstlik verdiyini, onların fikirlərinə diqqətlə yanaşdığını, dərsdə beyin həmləsi, venn diaqramı, sorğu, müzakirə kimi yeni təlim üsullarından, çoxlu sayda təlim resursundan bacarıqla istifadə etdiyini, inteqrasiyanı yaxşı apardığını  bildirdi.

Müzakirələrdə söz alan pedaqoji elmlər doktoru, professor Yəhya Kərimov, Bakı Şəhəri üzrə Təhsil İdarəsi müdirinin müavini Məhəbbət Qarabağlı, Təhsil Nazirliyinin şöbə müdiri Faiq Şahbazlı, BŞTİ-nin şöbə müdiri Sevinc Rəsulova, Təhsil Problemləri İnstitutu Kurikulum Mərkəzinin şöbə və bölmə müdirləri Əlişah Gərayev, Akif Əliyev, Azərbaycan Müəllimlər İnstitutunun dosenti Şahrza Ağayev, BPKİ və Yİ-nin direktor müavini Mönsün Alışov dinlədikləri dərslərin məziyyətlərindən danışdılar, məsləhət və təkliflərini bildirdilər.

Müzakirəni yekunlaşdıran Aydın Əhmədov "açıq dərs"lərin yüksək səviyyədə keçdiyini, müəllimlərin səviyyəsinin qənaətbəxş olduğunu, belə tədbirlərin tez-tez keçirilməsinin vacibliyini vurğuladı, məktəbin direktoru N.Gündüzlünün təşəbbüskarlığını, məktəbdə əlverişli təlim mühitinin yaradılması sahəsindəki fəaliyyətini təqdir etdi. 

Yusif ƏLİYEV