Bakıdakı 29 nömrəli orta məktəbdə 2010-cu il "Ekologiya ili"nə həsr  olunmuş  "açıq dərs" keçirildi.

Öncə Dövlət himni səsləndirildi. Sonra məktəbin direktoru Ələddin Əliyev çıxış edərək bildirdi ki, əsası  ümummilli liderimiz Heydər Əliyev tərəfindən qoyulmuş müasir Azərbaycanın inkişaf strategiyasını bu gün Prezident İlham Əliyev uğurla davam etdirir. Məhz bu diqqət və qayğının nəticəsidir ki, dövlət başçımızın sərəncamı ilə ölkəmizdə 2010-cu il "Ekologiya ili"  elan edilmişdir. Məktəbin pedaqoji kollektivi də xeyli iş  görüb. Tədbiri keçirməkdə məqsədimiz bu görülən işlərin davamı olaraq   məktəbin üç fənn müəlliminin komandalar şəklində keçdikləri "açıq dərs"i  dinləməkdir. 

Sonra biologiya müəllimi Məhəbbət Tağıyeva, coğrafiya müəllimi İmamət Əhmədova və kimya müəllimi Fazilə Məmmədova keçdikləri "açıq dərs" barədə qonaqlara məlumat verdilər. Şagirdlər 3 fənn üzrə ayrı-ayrı  komandalar şəklində öz yerlərində oturdular  və hər komandaya aid  suallar paylandı.

Nəhayət,  fənlər üzrə ayrı-ayrı komandaların cavabları dinlənildikdən sonra coğrafiya I, biologiya II və kimya komandası isə III yeri tutdular.

Qalib komanda məktəb rəhbərliyi tərəfindən fəxri fərmanla təltif olundu.

"Açıq dərs"də  iştirak edən Xətai Rayon İcra Hakimiyyəti başçısının müavini Xeyrulla Hüseynli, Bakı Şəhəri üzrə Təhsil İdarəsinin əməkdaşları Böyükağa Əhmədov, Nigar Şərifova, BDU-nun professoru Allahverdi Doluanov, dosent Telman Xəlilov, Azərbaycan Dövlət Neft Şirkətinin nümayəndələri Ceyhun Şıxəliyev və Mikayıl  Cabbarov hər üç fənn müəlliminin "açıq dərs"indən razı qaldılar.

Qonaqlar  bildirdilər  ki, ekologiya mövzusunda aparılan "açıq dərs"lər  gənc  nəslin sağlam və hərtərəfli inkişafına zəmin yaradır və tərbiyəvi təsirə  malikdir. Bütün təhsil ocaqlarında  bu cür tədbirlərin keçirilməsi məqsədəuyğun hesab edildi.

Şakir CƏFƏROV