Dekabrın 24-də Bakı Pedaqoji Kadrların İxtisasartırma və Yenidənhazırlanma İnstitutunda  "Azərbaycan Respublikasında dövlət uşaq müəssisələrindən uşaqların ailələrə verilməsi (de-institusionalizasiya) və alternativ qayğı Dövlət Proqramı (2006-2015-ci illər)" çərçivəsində "2010-cu ilin yekunları və qarşıda duran vəzifələr" mövzusunda keçirilən beynəlxalq konfransın davamı olaraq elmi-praktik konfrans  keçirildi.

Tədbirdə Türkiyə Respublikasının Sosial Xidmətlər və Uşaq Müdafiəsi Müdirliyinin, Şimali Kipr Türk Respublikasının Əmək və Sosial Xidmətlər Müdirliyinin və sosial xidmətlər üzrə YUNİSEF-in beynəlxalq ekspertləri və digər xarici qonaqlar iştirak edirdilər.

Konfransı giriş sözü ilə BPKİYİ-nin rektoru, professor Asəf Zamanov  açaraq rəhbərlik etdiyi təhsil ocağı barədə qonaqlara məlumat verdi. Sonra Azərbaycanda uşaqların müdafiəsi sahəsində görülən işləri qeyd etdi və bununla əlaqədar Təhsil Nazirliyi nəzdində müstəqil bir idarənin fəaliyyət göstərməsi barədə danışdı.

Bildirdi  ki, bununla əlaqədar 2010-2011-ci dərs ilində Bakı Pedaqoji Kadrların İxtisasartırma və Yenidənhazırlanma İnstitutunda "Sosial iş" ixtisası üzrə  9 aylıq kurs təşkil edilmişdir. Dövlət uşaq müəssisələrində tərbiyəçi vəzifəsində çalışanlar içərisindən 16  nəfər də bu il kursu bitirib.  Kursun maliyyə xərci  Beynəlxalq Əqli Sağlamlıq Təşəbbüsü  Təşkilatı tərəfindən ödənilib.

Sonra professor Asəf Zamanov müdavimlərə kursu bitirmələri barədə sertifikatlar təqdim etdi və onlara uğurlar arzuladı.

Konfransda iştirak edən xarici qonaqlar ölkələrində  uşaqların müdafiəsi ilə əlaqədar gördükləri işlər haqqında danışdılar, suallara cavablar verdilər.

Tədbir diskussiya şəklində başa çatdı.

Şakir CƏFƏROV