Azərbaycan Dillər Universitetinin rektoru, millət vəkili, professor Səməd Seyidov  Yaponiyanın Doşişa Universitetinin professoru Hisae Nakanishini qəbul edib. Görüşdə ölkələrarası, parlamentlərarası əlaqələrə və təhsil sahəsində əməkdaşlığa toxunan rektor Səməd Seyidov ADU haqqında qonağa məlumat verib. Universitetdə müxtəlif ölkələrin dil və mədəniyyət mərkəzlərinin açıldığını bildirən Səməd Seyidov ingilis, alman, fransız, ispan, italyan dillərinin öyrənilməsi ilə yanaşı, ADU-da beynəlxalq əlaqələr və regionşünaslıq, həmçinin tərcümə fakültələrinin olduğunu vurğuladı. Qeyd etdi ki, yapon dili və mədəniyyətinə ölkəmizdə hər zaman böyük maraq olmuşdur.

Xanım Hisae Nakanishi ADU-da olmasından fərəh hissi keçirdiyini bildirərək bu ali təhsil ocağı ilə Doşişa Universiteti arasında əlaqələrə toxunaraq qarşılıqlı əməkdaşlıq imkanlarından danışdı. O, bu əlaqələrin vacibliyini vurğuladı.

Görüşdə hər iki universitet arasında gələcək əməkdaşlığın perspektivləri müzakirə olundu. Sonra  yaponiyalı qonaq ADU-nun İnformasiya Resurs Kompleksi ilə də tanış oldu. 

ADU-nun İctimaiyyətlə
əlaqələr və mətbuat xidməti