Əməkdaşımız Yeni il ərəfəsində İctimai Televiziya və Radio Yayımları Şirkətində ədəbiyyat və incəsənət departamentinin direktoru, yazıçı və tərcüməçi İmir Məmmədli ilə görüşərək Yeni ilin bayram kimi qeyd olunması, yolkanın bəzədilməsi tarixi ilə bağlı söhbəti qələmə alıb.

- Radio verilişlərinizin birində şam ağacının bəzədilməsi ilə bağlı fərqli faktlardan danışdınız. Yolkanın Yeni ildə bəzədilməsi milad bayramı ilə bağlıdır?

- Şam ağacının bəzədilməsi milad bayramının atributuna sonradan çevrilib. Bu adət əvvəllər qədim türklərə məxsus olub. Bəllidir ki, qədim türklərdə "həyat ağacı" ilə bağlı maraqlı təsəvvürlər var idi. Həmin inanca görə, "həyat ağacı" yerin mərkəzindən göyə qədər ucalırdı. Göy Tanrı anlayışı da bir növ bununla bağlıdır. 22 dekabrda gecə ilə gündüz bərabərləşən zaman qədim türklər Tanrıya öz razılıqlarını bildirmək məqsədi ilə "həyat ağacı"nın  rəmzi olaraq şam ağaclarını bəzəyərdilər. Onun ətrafına dolanaraq Tanrıya dualar oxuyardılar. Maraqlı burasıdır ki, həmin ağaclardan evlərdə də bəzəyər, Tanrıdan gələn il üçün uğurlar diləyərdilər.

Qədim zamanlarda ovçular da yanvar ayında şam ağaclarından müxtəlif əşyalar və ət asardılar ki, Tanrı onlardan razı qalsın, qarşılarına bolluca şikar çıxarsın.

Həmin adətlər sonradan tədricən Avropaya keçdi və nəticədə milad bayramının bu gün gördüyümüz "Yolka" atributuna çevrildi. Xatırladım ki, ilk dəfə XVI əsrdə Almaniyada milad şənliyində bəzədilən yolka sonradan Fransaya, oradan da Avropanın başqa ölkələrinə yayıldı.

- İmir müəllim, söhbət üçün çox sağ olun. Yeni ildə sizə və çalışdığınız şirkətin bütün əməkdaşlarına daha yeni uğurlar, cansağlığı arzulayırıq.

- Bu əziz gündə Dünya azərbaycanlılarına, bütün türk dünyasına qəzetiniz vasitəsilə xoş arzularımı çatdırıram.

Söhbəti qələmə aldı:
Ş.MƏMMƏDOV