ALMANİYADA  bayram axşamı gələn ilin bütün aylarında havanın necə olacağını qabaqcadan müəyyənləşdirirlər. Onlar gələcək ilin ayları timsalında 12 ədəd baş soğan götürüb alt tərəfini kəsirlər və ora duz səpərək süfrəyə düzürlər. Saat 12-ni vuran kimi soğanlara baxırlar. Hansı soğan duzu əridib udubsa, o aylar yağmurlu, qalanları isə quraqlıq keçməsini bildirir.

AVSTRALİYALILAR  Yeni ilin ilk günü xərçəng yeyirlər. Belə hesab edirlər ki, xərçəngin geriyə hərəkəti yaxşı əlamət deyildir. Onlar həm də Yeni il  bayramında donuz əti yeməyi xoşlayirlar.

BOLQARISTANDA Yeni il axşamı uşaqlara alabəzək hədiyyələr və şirni bağışlamaq dəbdədir. Deyirlər ki, Yeni il axşamı kim çox uşaq sevindirsə, təzə ildə onun o qədər fərəhli günləri olacaq. Saat 12-ni vuranda bütün mənzillərdə işıqlar söndürülür. Üç dəqiqə davam edən qaranlıqda hamı bir-birini öpməlidir.

HİNDİSTANDA Yeni ili axşam yox, səhər qarşılayırlar. Həmin gün əsəbi, qəzəbli olmaq yaramaz. Hindlilərin inamına görə, belə adamlar ilboyu narahat həyat keçirirlər. Onlar inanırlar ki, Yeni ilin ilk günü necə keçərsə, o adam bütün ilboyu elə o cür həyat sürəcək. Hindlilər Yeni il bayramında qapı və pəncərələrini rəngbərəng isıqlı lampalarla bəzəyirlər. Mənası da budur ki, qapımız gələn qonaqların üzünə açıqdır. Bu bayramda tanış olmayanlar da bir-birinin evinə qonaq gedir və yeni ildə özlərinə yeni dost qazanırlar.

İTALİYADA il təhvil olanda küçələrdə adamlar çox ehtiyatla davranmalıdırlar. Ona görə ki, italyanlar Yeni il axşamı lazımsız, köhnə əşyaları, hətta mebelləri belə pəncərədən küçəyə tullayırlar. İtalyanların bu adətlərindən Yeni il axşamı şəhərin küçələrində var-gəl edən əcnəbilər daha çox ziyan çəkirlər. Hətta onların əksəriyyəti italyanların bu adətindən xəbərsiz olduqları üçün xəstəxanaya düşməli olurlar.

KUBADA Yeni il axşamı böyük çəlləklərə su doldurub pəncərələrə qoyurlar. Saat 12-ni vuran kimi köhnə ilə yaxşı yol diləmək məqsədilə suyu küçəyə atırlar. Yeni il axşamı hamının süfrəsində mütləq üzüm olmalıdır. Hər adam saatın əqrəbləri 12-nin üzərində olarkən onun zəngləri səsləndiyi müddətdə 12 gilə üzüm yeməlidir. Bu o deməkdir ki, ilin 12 ayında sənin həyatın üzüm kimi şirin olacaq.

MACARISTANDA Yeni il axşamı milli paltar geymiş cavanlar küçələrə çıxıb musiqi çala-çala gəzməyə başlayırlar. Dəstəbaşı təntənəli surətdə elan edir ki, köhnə ili "dəfn eləyib" yenisini qarşıladığımız üçün hamı yeyib-içib şənlənməlidir. Küçələri gəzən cavanlar hansı evin qarşısında dayansalar, ev sahibi mütləq onları ləzzətli yeməklərə və şəraba qonaq etməlidir.

RUMINİYADA Yeni il süfrəsi üçün içərisi sürprizlərlə dolu kökə bişirmək dəbdədir. Yağlı kökənin içərisinə daha çox pul, gümüş üzük, acı istiot qoyurlar. Yemək vaxtı kimin bəxtinə nə çıxdı, onun taleyi müəyyənləşir. Bəxtinə istiot çıxan adam ilboyu ehtiyatla dolanmalıdır ki, acı günlər ondan uzaq olsun. Kökəsindən pul və üzük çıxanları isə xoşbəxtlik gözləyir.

YAPONİYADA  Yeni ili 108 kilsə zəngi vurmaqla qeyd edirlər. Zəngdən sonra hamı yatır, şənlik isə səhərə yaxın başlanır.

YUNANISTANIN bəzi əyalətlərində Yeni ili yanvarın 3-də qarşılayırlar. Həmin gün kişilərə aid olan bütün hüquq və ixtiyar qadınlara verilir. Qadınlar qoyun və ya donuz kəsib təmizləyir, oxuya-oxuya gəzintiyə çıxırlar. Kişilər isə ev süpürür, qab-qacaq yuyur, uşaqlara baxırlar.  

Hazırladı: Ə.DAŞDƏMİRLİ