|
Bu günlərdə məktəb VMA-larının sırasına daha
biri də əlavə olunmuş, Bakıdakı 151 nömrəli orta
məktəbdə analoji qurum fəaliyyətə başlamışdır.
Bu münasibətlə fevralın 27-də məktəbdə keçirilən
təsis konfransında Milli Valideyn-Müəllim
Assosiasiyasının icraçı direktoru Təranə
Şərifova, bir sıra məktəblərin və VMA-ların
rəhbərləri, digər qonaqlar iştirak edirdilər.
Konfrans iştirakçıları öncə məktəbin foyesində
açılmış şagirdlərin əl işlərindən və rəsm
əsərlərindən ibarət sərgi ilə tanış oldular.
Sonra VMA-nın fəaliyyəti üçün nəzərdə tutulmuş
və lazımi avadanlıqla təchiz edilmiş mərkəzin
açılışı oldu. Açılış lentini kəsən Azərbaycan
Milli VMA-nın icraçı direktoru T.Şərifova
mərkəzin işinə uğurlar arzuladı.
Təsis konfransını açan məktəbin direktoru
Kifayət Tanrıverdiyeva valideynlərin təhsil
ocaqlarına cəlbi üçün VMA yaradılması təşəbbüsü
ilə çıxış etdiklərini, təşəbbüs bəyənildikdən
sonra təşkilat komitəsi yaratdıqlarını və
müvafiq iş apardıqlarını diqqətə çatdırdı.
Dövlət himninin ifasından və Xocalı faciəsi
qurbanlarının xatirəsi bir dəqiqəlik sükutla yad
edildikdən sonra konfransın işçi heyəti seçildi.
Məktəb üzrə VMA-nın təşkilat komitəsinin sədri,
məktəbin müəllimi Mehriban Əliyeva,
assosiasiyanın yaradılması ilə bağlı təşkilati
işlərdə tədris ocağına yaxından köməklik
göstərmiş 20 nömrəli məktəbin VMA-nın
vitse-prezidenti Şahin Rəcəbli təsis konfransına
hazırlıq çərçivəsində görülmüş işlər barədə
məlumat verdilər. Qeyd olundu ki, VMA-nın
mahiyyəti, görəcəyi işlərlə əlaqədar məktəbin
şagirdləri, valideyn və müəllimləri ilə
söhbətlər aparılmış, treninqlər keçirilmiş,
digər məktəblərdə fəaliyyət göstərən VMA-ların
iş təcrübələri öyrənilmişdir. Eyni zamanda
diqqətə çatdırıldı ki, assosiasiyanın əsasnaməsi
hazırlanmış, onun normal fəaliyyət göstərə
bilməsi üçün məktəbdə otaq ayrılmışdır.
Konfransda çıxış edən Milli VMA-nın icraçı
direktoru Təranə Şərifova təşəbbüsü yüksək
qiymətləndirdi, aparılmış hazırlıq işlərini
qənaətbəxş saydı. VMA-ların rolundan danışan
T.Şərifova onun indiyədək zəif olan
valideyn-müəllim əlaqəsini gücləndirəcəyinə, bir
çox probleminin həllində, normal təlim mühitinin
yaradılmasında valideynlərin məktəbə yardımçı
olacağına, öz övladlarının tərbiyəsində yaxından
iştirak edəcəklərinə inandığını söylədi, ölkədə
yeni VMA modelinin tətbiqi istiqamətində görülən
işlərdən danışdı. Qeyd etdi ki, artıq 1000-ə
qədər ümumtəhsil məktəbində VMA yaradılıb,
fəaliyyət göstərir. Onlar aparılan təhsil
islahatlarında valideynlərin fəal iştirakına,
onlar arasında maarifləndirmə işlərinin,
rəngarəng məktəb tədbirlərinin yüksək səviyyədə
təşkilinə öz töhfələrini verirlər. Bu baxımdan
Avropa Liseyi VMA-nın uğurları xüsusi qeyd
olundu.
Sonra konfransda assosiasiyanın nizamnaməsi
təşkilat komitəsinin VMA-nın 17 nəfər müəllim və
valideyndən ibarət idarə heyətinin,
nəzarət-təftiş komissiyasının tərkibləri,
təşkilat komitəsinə rəhbərlik etmiş Mehriban
Əliyevanın yeni quruma prezident seçilməsi
barədə təklifləri müzakirə edildi və səsə
qoyularaq müəyyən əlavələrlə qəbul olundu.
Təsis konfransında iştirak edən Bakı şəhəri 190,
5, 42 və 164 nömrəli orta məktəblərin
direktorları Afət Bakıxanova, Nərminə Gündüzlü,
Firəngiz Həmidova, Kəmalə Qədirova çıxışlarında
VMA-nın yaradılması münasibəti ilə məktəbin
müəllimlərini və valideynləri təbrik etdilər,
quruma fəaliyyətində uğurlar arzuladılar, öz
işini daha səmərəli qurması üçün bir sıra
məsləhət və tövsiyələrini verdilər.
Sonda 151 nömrəli məktəbin direktoru
K.Tanrıverdiyeva qonaqlara və valideynlərə
minnətdarlıq edib assosiasiyanın işinə uğurlar
dilədi.
Konfrans istedadlı şagirdlərin nümayiş
etdirdikləri kiçik bədii proqramla başa çatdı.
Yusif ƏLİYEV |
