|
Bakıdakı 313 nömrəli orta məktəbdə "Müasir
dərsə verilən tələblər" mövzusunda "açıq dərs"
keçirildi. Tədbirdə Binəqədi Rayon İcra
Hakimiyyətinin təhsil, səhiyyə və mədəniyyət
şöbəsinin, Bakı Şəhəri üzrəTəhsil İdarəsinin
nümayəndələri və qonşu məktəblərdən dəvət
olunmuş müəllimlər iştirak edirdilər.
Tədbiri giriş sözü ilə açan məktəbin direktoru
Zakir Bayramov keçiriləcək "açıq dərs"lər
haqqında ətraflı məlumat verdi. Məktəbin
təlim-tərbiyə işləri ilə yaxından tanış olduqdan
sonra müəllimlərin "açıq dərs"lərində iştirak
etdilər.
Əvvəlcə I "A" sinfində Sevda Ağayevanın
riyaziyyatdan "Onluqlar və təkliklər"
mövzusunda keçdiyi "açıq dərs"i dinlənildi.
Müzakirələr zamanı Bakı Şəhəri üzrə Təhsil
İdarəsi metodmərkəzinin direktor müavini Sitarə
Məmmədova bildirdi ki, müəllimin "açıq
dərs"i metodiki baxımdan Milli Kurikulumların
tələb etdiyi standartlar əsasında yüksək
səviyyədə keçdi. Müəllim dərs prosesində
şagirdləri dörd komandaya -"Qırmızılar",
"Sarılar", "Bozlar" və "Gümüşülər"
komandalarına bölməklə onların fəallığını təmin
edə bildi və keçdiyi mövzuya dair əyani
vəsaitlərdən istifadə etməklə fənlərarası
inteqrasiya yaratdı.
Bakı Şəhəri üzrə Təhsil İdarəsi metodmərkəzinin
Binəqədi və Nəsimi rayonlarının bölmə sədri
Həvva Əsgərova və həmin bölmənin riyaziyyat
üzrə metodisti Ehram Nuriyev dinlədikləri
dərsdən razı qaldıqlarını bildirməklə bərabər,
bəzi irad və tövsiyələrini də qeyd etdilər.
Sonra məktəbin VII "B" sinfində Mərdan
İsmayılovun riyaziyyatdan "Kvadrat tənliklər
fəslinin təkrarı və çalışmalar həlli"
mövzusunda keçdiyi "açıq dərs" dinlənildi.
Dərslə əlaqədar keçirilən müzakirələrdə
bildirildi ki, müəllim "açıq dərs"də
şagirdlərin zehni fəallığını təmin etdi,
qazandıqları bilikləri sistemə saldı və
öyrənilən mövzuların şagirdlər tərəfindən
dərindən mənimsənilməsində pedaqoji
ustalığını göstərdi. Həmçinin dərsdə əyani
vəsaitdən istifadəyə geniş yer verildi.
"Açıq dərs"in təhlilində S.Məmmədova,
H.Əsgərova, X.Cəfərova və digər müəllimlər də
"Tusi", "Pifaqor", "Viyet" və "Fales"
komandalarında təmsil olunan şagirdlərin
fəallığını qeyd etdilər və bu komandaların
adını daşıdığı alimlər barəsində qısa da olsa,
sinfə müəllim tərəfindən məlumat verilməsinin
vacibliyini vurğuladılar. Onlar "açıq
dərs"də riyaziyyat müəllimi Mərdan İsmayılovun
şagirdlərin qruplar şəklində bilik yarışının
yaxşı təşkil etməsindən, komandalar arasında
qiymətləndirmə işinin düzgün aparmasından və
müasir dərsə verilən tələbləri bacarıqla
yerinə yetirə bilməsindən razı qaldıqlarını
bildirdilər.
Tədbirin sonunda müəllimləri maraqlandıran bir
sıra suallara da cavab verildi.
Şakir CƏFƏROV |
