|
Martın 3-də Azərbaycan Milli Elmlər
Akademiyasında "Azərbaycanda elmin, təhsilin
inkişafında diasporun rolu" mövzusunda "dəyirmi
masa" keçirilib.
Tədbir Azərbaycandan Kənarda Təhsil Almış
Mütəxəssislər Təşkilatı (AKTAMT) tərəfindən "Azərbaycan
Respublikasında 2009-2015-ci illərdə elmin
inkişafı üzrə Milli Strategiya"ya uyğun olaraq
təşkil edilib. Həmin tədbirdə AKTAMT-ın Təhsil
Nazirliyi, AMEA, Diasporla İş üzrə Dövlət
Komitəsi, Azərbaycan Texniki Universiteti,
AMEA-nın İnformasiya Texnologiyaları İnstitutu
və Azərbaycan Turizm İnstitutu ilə birgə
reallaşdırdığı "Azərbaycanın elmi diasporu"
layihəsi çərçivəsində fəaliyyətə başlayan
İnternet portalının (www.
elmidiaspora.internet.az) təqdimatı olub.
AMEA-nın prezidenti, akademik Mahmud Kərimov
Azərbaycan elminin, təhsilinin inkişafında elmi
diaspor amilinin mühüm əhəmiyyət kəsb etdiyini
bildirib və bu baxımdan layihənin önəmli rol
oynadığını vurğulayıb. AKTAMT-ın sədri, "Azərbaycan
elmi diasporu"nun əlaqələndiricisi Natiq Əhmədov
çıxışında "dəyirmi masa" iştirakçılarına bu
layihə ilə bağlı məlumat verərək qeyd edib ki,
əsas məqsəd xaricdə yaşayan
həmvətənlərimizin-alimlərin, tədqiqatçıların,
müasir texnika və texnologiya sahəsində
fəaliyyət göstərən qabaqcıl mütəxəssislərin
informasiya-analitik məlumat bankının
yaradılması və Azərbaycanın elmi diasporu
haqqında İnternet portalının hazırlanmasıdır.
Layihə həm də xaricdə yaşayıb elmi-tədqiqat,
innovasiya sahəsində çalışan həmvətənlərimizlə
respublikamızda fəaliyyət göstərən alimlərin
İnternet şəbəkəsində daimi dialoqunun
yaradılmasına yardım edəcəkdir. Bu layihə
dünyanın 56 (Azərbaycanın diaspor təşkilatının
olduğu 40 ölkədə və hələlik diasporun
formalaşmadığı, lakin səfirliklərin fəaliyyət
göstərdiyi 16 ölkədə) dövlətini əhatə edəcəkdir.
Tədbirdə İnformasiya Texnologiyaları
İnstitutunun direktoru Rasim Əliquliyev,
professorlar Şahlar Əsgərov, Ramiz Hümbətov,
Təhsil Nazirliyinin şöbə müdiri Qulu Novruzov,
Gəncə Təhsil-Məlumat Mərkəzinin direktoru Həsən
Hüseynli çıxış edərək layihənin ölkəmizdəki
virtual elm-təhsil məkanının yaradılması ilə
yanaşı, bir sıra vacib məsələlərin həllində də
əhəmiyyətli rol oynayacağını qeyd etmişlər.
Hicran ƏKBƏROVA |
