|
Naxçıvan Dövlət Universitetində 8 Mart
Beynəlxalq Qadınlar Günü münasibəti ilə tədbir
keçirilmişdir. Tədbirdən əvvəl roman german
dilləri kafedrasının müəllimi Məhsəti
Əsgərovanın əl işlərindən ibarət sərgi ilə
tanışlıq olmuşdur. Tədbiri giriş sözü ilə
universitetin rektoru, akademik İsa Həbibbəyli
açmışdır. Qeyd olunmuşdur ki, bu gün
cəmiyyətimizin inkişafında qadınların rolu
əvəzsizdir. Humanizm, insanpərvərlik Azərbaycan
qadınını daim səciyyələndirmişdir. Azərbaycan
qadını tarixin bütün mərhələlərində nəyə qadir
olduğunu sübuta yetirmişdir.
Rektor çıxışında vurğulamışdır ki, muxtar
respublikamızda da bütün sahələrdə qadınlar
fəallıq göstərirlər. İstər elm, mədəniyyət,
istərsə də səhiyyə ocaqlarında öz vəzifələrinin
öhdəsindən uğurla gələn qadınlarımıza dövlətimiz
tərəfindən daim diqqət və qayğı göstərilir.
Eləcə də universitetimizin qadın müəllimləri
elmin, təhsilin inkişafı və tərəqqisi üçün
əllərindən gələni əsirgəmirlər.
Sonra İngilis dili kafedrasının müdiri,
filologiya elmləri namizədi Ceyran Quliyeva
məruzə etmişdir. Məruzədə Beynəlxalq Qadınlar
Gününün yaranma tarixindən, Azərbaycanın
ictimai-siyasi, sosial həyatında qadınların
aparıcı mövqeyindən, universitetin çoxsaylı
qadın kollektivinin bugünkü uğurlarından ətraflı
bəhs olunmuşdur.
Tədbirin sonunda isə universitetin Vokal və
dirijorluq kafedrasının müdiri, Naxçıvan Muxtar
Respublikasının əməkdar artisti Validə
Hüseynovanın rəhbərlik etdiyi xarici
tələbələrdən ibarət vokal qruplarının hesabat
konserti olmuşdur. Universitet tarixində
əlamətdar olan ilk beynəlmiləl konsertdə
nigeriyalı, koreyalı, banqladeşli, türkiyəli,
iranlı tələbələrin ifasında müxtəlif millətlərin
xalq mahnıları qadınlarımız üçün əsl bayram
töhfəsi olmuşdur.
Leyla ZEYNALOVA
Naxçıvan Özəl Universitetində 8 Mart Beynəlxalq
Qadınlar Günü münasibətilə tədbir keçirildi.
Tədbiri giriş sözü ilə universitetin rektoru,
professor İsmayıl Əliyev açaraq qeyd etdi ki,
Azərbaycan tarixinin yarıməsrlik dövrü ümummilli
lider Heydər Əliyevin adı və yorulmaz fəaliyyəti
ilə sıx bağlıdır. Ulu öndər Heydər Əliyev
Azərbaycan qadınlarının vəziyyətinin
yaxşılaşdırılması sahəsində də yetkin dövlət
siyasətinin həyata keçirilməsini əsas aparıcı
istiqamətlərdən biri hesab etmiş, bu sahəyə
xüsusi diqqət və qayğı göstərmişdir.
Vurğulandı ki, Azərbaycan qadınının mərdliyi,
dözümlülüyü, səmimiyyəti, paklıq və sədaqəti,
vəfa və isməti ən ali dəyər kimi həmişə
qiymətləndirilib. Ümummilli liderimiz Azərbaycan
qadınları haqqında demişdir: "Mən bütün
fəaliyyətimdə həmişə qadınlara arxalanmışam,
onları özümün dayağı hesab etmişəm".
Bu gün qadınlar cəmiyyətin idarə edilməsində,
dövlət əhəmiyyətli işlərdə xüsusi rola
malikdirlər.
Naxçıvan Özəl Universitetinin rektoru,
professor İsmayıl Əliyev bir daha qadınları
təbrik etdi, onlara gələcək işlərində uğurlar
arzuladı.
Mina QASIMOVA |
