Ulu öndərimiz Heydər Əliyevin "Təhsil millətin gələcəyidir" müdrik sözlərini həmişə bəyənmiş və təqdir etmişəm. Bir millətin işıqlı istiqbala və gələcəyə  yiyələnə bilməsi üçün təhsilin önəmi danılmaz və şübhəsizdir. Odur ki, hazırkı iqtisadi inkişaf və dünyaya inteqrasiya şəraitində ölkəmizdə inkişaf etməkdə olan elm və təhsilin bizi hədəf seçdiyimiz parlaq və mütərəqqi gələcəyə qüvuşmağımızı daha da yaxınlaşdıracağını  düşünür və buna inanıram.

Bunları söyləyərkən əsas gətirdiyim, istinad etdiyim bir sıra amillər vardır, əlbəttə ki, yeni məktəblərin tikilməsi, mövcud olanların madditexniki bazasının yaxşılaşdırılması yolunda atılan addımlar və s. Belə amillərdən biri də tədris müəssisələrinin pulsuz dərsliklərlə təminatıdır. Bildiyimiz kimi, uzun müddət Azərbaycan məktəblərində yaşanan və tədrisin keyfiyyətinə bilavasitə mənfi təsir göstərən dərslik çatışmazlığı probleminin, artıq bir neçə ildir ki, həll edilməsi təqdirəlayiq hal olmaqla biz şagirdləri sevindirir. Zənnimcə, elm və biliyə meyil edən, dəyər verən və keyfiyyətli təhsil almaq istəyən hər bir şagird bundan ruhlanmışdır. Şəxsən mən bir Azərbaycan vətəndaşı və şagirdi olaraq qürurlanır və sevinirəm.

Ancaq, əfsus ki, hərdən kitaba qarşı etinasız münasibətlə qarşılaşarkən üzülməyə bilmirəm.  Birini bu və ya digər kitabı "vərəq" sanıb yazarkən və ya hər hansı bir şəkildə zədələyərkən görüncə,  bunların bizim üçün, təhsil ala bilməmiz üçün külli miqdarda vəsait müqabilində ərsəyə gəldiyini düşünərək təəssüflənir  və belələrini hər vəchlə əngəlləməyə və çəkindirməyə çalışıram.

Mənim düşüncəmə görə, yalnız kitaba qayğı ilə yanaşan, ona dəyər verən və hörmət edən kəs uğur və müvəffəqiyyətə nail ola bilər.  Kitaba qarşı xoş rəftar ona dəyər vermənin nişanəsidir, kitabı dəyərləndirən və sevən şəxs isə elmi dəyərləndirəndir. Odur ki, hər bir şagirdə kitabları sevməyi və qorumağı tövsiyə edirəm.  Əks təqdirdə, gələcək nəsillərin dövlətimizin bizlərə göstərdiyi qayğıdan tam yararlana bilməsini əngəlləmiş olarıq.  Ümumiyyətlə, bizim rifahımız üçün yaradılan, bizə bilgi verəcək, faydalana biləcəyimiz hər bir şeyə yüksək qiymət verib onu sevməliyik. Var olanı dəyərləndirərək, şübhəsiz, daha çox şey qazana bilərik. Və təbii ki, bütün bu keyfiyyətləri və xüsusiyyətləri bizlərə aşılamaq yolunda müəllimlərimiz də əsas rola malikdirlər. Düşünürəm ki, yuxarıda qeyd olunmuş  arzuolunmaz və xoşagəlməz hallardan qorunmaq üçün onların üzərinə maarifləndirmə baxımından ciddi və önəmli iş düşür.

Biz isə işıqlı Azərbaycan gələcəyinin bizlərə ehtiyacı olduğunu düşünsək, yaşadığımız dövrün ən yüksək keyfiyyətlərindən yararlanaraq layiqli vətəndaş ola bilmək yolunda daha da əzmlə çalışmaqla, bunu özümüz üçün ümdə amala çevirməklə xoşbəxt və firavan gələcəyə daha yaxın ola bilərik.   

Fəxri XANLARZADƏ,
Zərdab şəhəri 1 nömrəli H.Zərdabi
adına məktəb-liseyin XI sinif şagirdi