Bakıdakı 1 nömrəli uşaq evinin "Azəri" mahnı və rəqs ansamblı bu il 19-25 sentyabr tarixlərində  Sankt-Peterburq Şəhər Meriyasının maliyyə və "Kastalskiy Klyuç" İctimai Birliyinin təşkilatı dəstəyi ilə keçirilən yetim və valideyn himayəsindən məhrum olmuş uşaqların beynəlxalq  bədii- yaradıcılıq festivalında uğurla çıxış edərək I yerə layiq görülüb. Məlumat üçün bildirək ki, "Kastalskiy Klyuç" İctimai Birliyi Qrişenko Nataliya Vladimirovnanın rəhbərliyi altında fəaliyyət göstərir.  Bu festival adıçəkilən ictimai birliyin  yetim və valideyn himayəsindən məhrum olmuş uşaqlar üçün Sankt-Peterburqda təşkil etdiyi üçüncü  yaradıcılıq festivalıdır.

Festivalın keçirilməsində əsas məqsəd yetim və valideyn himayəsindən məhrum olmuş uşaqların estetik tərbiyəsinin inkişaf etdirilməsidir. Qeyd edək ki, həmin festivalda 7 ölkədən 12 rəqs kollektivi müxtəlif janrlarda öz məharətlərini nümayiş etdirib. Azərbaycanı  Bakıdakı 1 nömrəli uşaq evinin "Azəri" mahnı və rəqs ansamblı təmsil edib. Ansambl bu günlərdə Vətənə dönüb.

Səfər təəssüratlarını bizimlə bölüşən 1 nömrəli uşaq evinin direktoru Nərminə Zöhrabova bildirdi ki, 2003-cü ildən fəaliyyət göstərən ansamblın kifayət qədər uğurları var. İstər respublikamızda, istərsə də xarici ölkələrdə keçirilən müsabiqələrdə, festivallarda, eləcə də bir sıra dövlət tədbirlərində müvəffəqiyyətlə çıxış edən ansambl uşaq evinə hər zaman başucalığı gətirib. Ansamblda yüksək səhnə mədəniyyətinə malik olduqca istedadlı uşaqlar var. Hər çıxışına ilk çıxışı kimi böyük coşqu, eyni zamanda məsuliyyətlə yanaşan kollektivin üzvləri qazandıqları uğurları da elə  ilk uğurları kimi qəbul edirlər.

Uşaq evinin direktoru "Azəri" mahnı və rəqs ansamblının Sankt-Peterburq şəhərindəki beynəlxalq festivalda ilk dəfə çıxış etməsinə baxmayaraq, I yerə layiq görülməsinin onlara olduqca xoş təsir bağışladığını dedi. Onu da bildirdi ki, festivalda iştirakçılardan incəsənətin müxtəlif janrlarında - klassik, xalq, müasir rəqs nömrələri üzrə və eyni zamanda, pantomima, sirk nömrələri və parodiya ilə çıxış etmək tələb olunurdu. Ansambl festivalda ümumilikdə 6 rəqslə çıxış edib, 2 mövzuda - "Xeyir və şər" və ölməz bəstəkarımız Üzeyir Hacıbəylinin "Arşın mal alan" operasından isə  müəyyən bir hissəni hazırlayaraq  pantomima göstəriblər. "Xeyir və şər" mövzusunda hazırlanmış pantomima səhnəciyini  Xocalı soyqırımına həsr etdiklərini bildirən direktor uşaqların həmin faciəni kövrək duyğularla, müəyyən mimika, ifadəli hərəkətlərlə başqa millətin nümayəndələrinə məharətlə çatdıra bildiklərini və bu çıxışın tamaşaçılarda kədərli hisslər oyatdığını, onların təsirləndiklərini söylədi.

Uşaqlar  tərəfindən nümayiş olunan istər rəqslər, istərsə də  göstərilən pantomimalar  münsiflər heyəti, eyni zamanda digər ölkələrin iştirakçıları və bütövlükdə tamaşaçılar tərəfindən böyük maraqla qarşılanb. Hamının rəğbətini qazanan ansamblın uğurlu çıxışlarının ayrı-ayrı məqamlarından söz açan N.Zöhrabova  bu səfərin yaddaqalan olduğunu vurğuladı. Belə ki,  Azərbaycan nümayəndələri səfər çərçivəsində Ermitajda, Perqof, Qatçina  və A.S.Puşkinin ev-muzeyində olublar. Onlar  həmçinin Böyük Kukla Teatrında, Musiqili Komediya Teatrında tamaşalara baxıblar, Sankt-Peterburqun bir sıra görməli yerlərinə baş çəkiblər.

Direktor onu da əlavə etdi ki, digər ölkələrin iştirakçıları ilə söhbət zamanı onlar dövlətimiz tərəfindən yetim və valideyn himayəsindən məhrum olmuş uşaqlara necə diqqət və qayğı ilə yanaşılmasının şahidi olduqlarını söyləyir, ölkəmizdə belə uşaqlar üçün yaradılan şəraitin yüksək səviyyədə olmasını müsbət qiymətləndirirdilər.

Ölkəmizdə  yetim və valideyn himayəsindən məhrum olan uşaqlara göstərilən qayğıdan razılıq hissi ilə danışan  Nərminə Zöhrabova Təhsil Nazirliyinin bu istiqamətdə həyata keçirdiyi işləri yüksək dəyərləndirdi.  1 nömrəli uşaq evinin mahnı və rəqs ansamblına yüksək etimad göstərərək onların belə bir geniş tərkibdə festivalda iştirakını təmin etdiklərinə görə təhsil naziri Misir Mərdanova öz təşəkkürünü bildirdi. 

Samirə KƏRİMOVA