|
Uşaqların gələcəyi qayğısına qalmaq, onların
xoşbəxt və rahat həyatını təmin etmək üçün
əlindən gələni əsirgəməmək azərbaycanlıların
milli xüsusiyyətlərindəndir. Deyə bilərik ki,
biz bu aspektdə daha çox səy göstəririk.
Uşaqlarımız məktəbə getməyə başlayandan onların
mükəmməl təhsil almalarına çalışır, yaxşı
məktəb, yaxşı müəllim axtarırıq.
Kimliyimizdən asılı olmayaraq, hamımız həm də
valideynik. Mənim övladlarım Bakıdakı Əsəd
Əhmədov adına 308 nömrəli məktəbdə təhsil
alırlar.
Məktəbdə ciddi nizam-intizam var. Məncə, bu
bütün valideynlərin ürəyincə olan haldır. Məni
xüsusilə razı salan isə müəllim kollektivinin
səmimi, qayğıkeş olması, təlimə ciddi münasibət
göstərməsidir.
Qızımın riyaziyyat dərsində iştirak edərkən
müəllim Vəsilə Məmmədovanın mövzunu şagirdlərə
mükəmməl çatdıra bilməsi, aktiv şəkildə dərsə
cəlb etməsi xoşuma gəldi. Həm də sinif rəhbəri
şagirdlərin davranışlarına səriştəli bir pedaqoq
kimi nəzarət edirdi.
Azərbaycan dili müəllimi Səadət Rzayeva isə öz
tələbkarlığı ilə şagirdləri passivlikdən
uzaqlaşdırmağı məharətlə bacarır. Qısa zaman
ərzində şagirdlərin keçmiş mövzuya hazırlıq
səviyyəsini obyektiv şəkildə qiymətləndirməyi
bacaran gənc müəllim yeni mövzunun uşaqlar
tərəfindən tam qavranılmasına nail olur.
Hesab edirəm ki, övladlarımın ana dilimizi
incəliklərinə qədər öyrənə bilməsi,
riyaziyyatdan misal və məsələləri həvəslə həll
etməsi Səadət müəllimin, Vəsilə müəllimin
əməyinin nəticəsidir.
308 nömrəli məktəbdə belə müəllimlər az deyil.
Çoxillik pedaqoji təcrübəsi olan Şükufə Aslanlı
coğrafiya fənnini tədris edir. Sinifdə vaxtaşırı
bilik yarışmaları təşkil edən Şükufə müəllim
qızımda coğrafiya fənninə böyük həvəs yaradıb.
İbtidai sinif müəllimi Vəsilə Şahbazova da razı
qaldığımız müəllimlərdəndir. Mən onların
hamısına təşəkkür edirəm.
Bəzən olur ki, valideynlər hansısa müəllimin ya
dərs üslubundan, yaxud da şagirdin biliyini
obyektiv qiymətləndirməməsindən razı qalmır.
Ancaq düşünürəm ki, narazılıqlarımızı
bildiririksə, razılıqlarımızı niyə söyləməyək?
Mən bir valideyn olaraq 308 nömrəli məktəbdə
işləyən Vəsilə Məmmədova, Səadət Rzayeva, Şükufə
Aslanlı, Vəsilə Şahbazovaya, eləcə də onların
timsalında əsl müəllimlərə minnətdarlığımı
bildirir, onlara uğurlar arzulayıram.
Bir də onu demək istəyirəm ki, yaxşı
müəllimlərin sayı çox olduqca biz valideynlərdə
övladlarımızın gözəl gələcəyinə ümidlər də
artır.
Elgül KƏRİMOVA,
valideyn, tibb üzrə
fəlsəfə doktoru |
