Tarixən dövlətlərin və mədəniyyətlərin təşəkkül məskəni olan Mərkəzi Asiya və Qafqaz regionu geostrateji mövqeyi, malik olduğu sərvətləri və hazırkı sürətli inkişafı baxımından dünya ictimaiyyətinin diqqətini daha çox cəlb edir. Bu səbəbdən qloballaşan dünyada Qafqaz və Mərkəzi Asiyanın yerini və rolunu elmi cəhətdən təhlil etmək xüsusi əhəmiyyət daşıyır. Məhz buna görə də Qafqaz Universiteti 2003-cü və 2007-ci illərdə bu sahədə keçirdiyi I və II Beynəlxalq Konqresin davamı olaraq Azərbaycan Dövlət İqtisad Universiteti ilə birgə "Qloballaşma prosesində Qafqaz və Mərkəzi Asiya" mövzusunda III Beynəlxalq Konqres təşkil etmək təşəbbüsü ilə çıxış edib. Beynəlxalq Konqres oktyabrın 15-dən 17-dək Azərbaycan Dövlət İqtisad Universitetinin II tədris korpusunda keçiriləcək.

Bununla əlaqədar oktyabrın 13-də Qafqaz Universitetində mətbuat konfransı keçirilib. Konfransda beynəlxalq tədbir haqqında jurnalistlərə ətraflı məlumat verən Qafqaz Universitetinin rektoru, professor Ahmet Saniç bildirib ki, konqresin təşkilinə Azərbaycan Respublikası Təhsil Nazirliyi, Sənaye və Energetika Nazirliyi, İqtisadi İnkişaf Nazirliyi, Türkiyə Respublikasının Baş Nazirliyi Türk Əməkdaşlıq və İnkişaf İdarəsi Başqanlılığı (TİKA) Bakı Koordinatorluğu, Azərbaycan-Türk Sənayeçi və İş Adamları Beynəlxalq Cəmiyyəti (TUSİAB), Türkiyə İsrafi Öyrənmə Vəqfi, ABŞ-ın Troy Universiteti yaxından dəstək veriblər.

Konqresdə dünyanın 13 ölkəsinin ali məktəblərindən nümayəndələr iştirak edəcək. Artıq 170 məruzə təqdim olunmuş konqresin 3 bölmədə aparılması, bölmələrdə "Qloballaşma prosesində təhsil", "Qloballaşma prosesində Azərbaycan-Türkiyə iqtisadi əlaqələri və gələcək perspektivlər", "Regional inkişafın əhəmiyyəti və tətbiq edilən siyasətlər" mövzularında məruzələr dinləniləcək, çıxışlar olacaq, müzakirələr aparılacaq.

Y.ƏLİYEV