|
"Biz maddi dəyərlərimizi, iqtisadi
potensialımızı insan kapitalına çevirməliyik.
Çünki insanın savadı, biliyi onun gələcək
həyatını müəyyən edir, ölkənin hərtərəfli
inkişafına xidmət edir". Azərbaycan
Respublikasının Prezidenti İlham Əliyevin bu
sözləri bütün müəllimlər kimi məni də hər zaman
yüksək məsuliyyət daşımağa vadar edir.
 Bu
günün müəllimi öz işini yeni müstəvidə qurmalı,
şagirdlərlə, valideynlərlə, həmkarları ilə yeni
tərzdə qarşılıqlı fəaliyyətdə olmalıdır.
Dərsləri yeni üslubda təşkil etməlidir. Müasir
elm və texnikanın nailiyyətlərindən tam şəkildə
bəhrələnməyi bacarmalıdır. Kurikulum islahatı
bunu hər birimizdən tələb edir.
Kurikulumun tətbiqi ilə əlaqədar bir çox
müəllimlər kimi mən də ilk öncə vaxt
çatışmazlığı ilə qarşılaşdım. Lakin yeni
qiymətləndirmə konsepsiyasında əksini tapmış
diaqnostik qiymətləndirmənin aparılmasının
məqsədləri barədə düşündükdə anladım ki, bu, hər
bir şagirdə hər fənn üzrə fərdi yanaşma və hər
sinifdə yeni öyrənmə mühitinin yaradılmasına
imkan verir. Müəllimin ustalığı ondan ibarətdir
ki, təqdim olunan vəsaitlərin və təlimatların ən
optimal variantlarından dərs prosesində istifadə
etsin.
Bu gün dərs dediyim körpə balalar ilk müstəqil
addımlarını atarkən onlarda öyrəndiklərini
həyata keçirmək, həyati təcrübələrinə əsaslanıb
fikir söyləmək, geniş dünyagörüşü formalaşdırmaq
ən böyük amalımdır.
Təlim prosesində yalnız bilik əldə edilməsi,
bacarıq formalaşdırılması ilə məhdudlaşa
bilmərik. Düşünürəm ki, 6 yaşlı şagirdlərlə iş
zamanı emosiyalar, hisslərə toxunulması,
öyrənməyə maraq yaradılması xüsusilə vacibdir.
Bunun üçün bütün imkanlardan istifadə etməyə
çalışıram. Hər bir dərsdə, sinifdənkənar
məşğələdə şagirdlərimdə maraq oyadaraq
yaradıcılığa cəlb etdikdə, onların ən kiçik
uğurlarını gördükdə özümü ən uca zirvələri fəth
etmiş bir insan sayıram.
Bu gün yaxşı müəllim olmaq nə deməkdir? Bu sual
məni hər zaman düşündürür. Məncə bu, gündəlik
hazırlıqlı, müasir təlim üsulları, yeni pedaqoji
mühiti, demokratik tədris üsullarını, İKT-ni
geniş tətbiq edən, qabaqcıl təcrübəni öyrənən və
ən yaxşı nümunələri seçə bilən, öz sənətinə
vurğun olan müəllimdir.
Bu gün artıq nəticəyönümlü təhsilin müsbət
tərəfləri özünü göstərir və hər birimiz bunu öz
təcrübəmizdə görürük. Hər birimiz təqdim olunmuş
vəsaitlərin (ikinci sinif) tətbiqinə tam
yaradıcılıqla yanaşmalıyıq.
Təhsilin keyfiyyəti müasir şəraitdə hər bir
şagirdin uğurlu, müstəqil həyat fəaliyyətinə
hazırlıq keyfiyyəti kimi başa düşülməlidir. Bu
gün biz şagirdlərin formalaşmasında "təməl
daşını qoyan" ibtidai sinif müəllimlərinin
peşəkar fəaliyyətlərində vacib olan
dəyişiklikləri nəzərə almalıyıq.
Bunlara pedaqoji məqsədlərin şagirdin
özünürealizə oriyentasiyası və təhsil
nəticələrinin (kompetensiyaların) təyin
edilməsi; təhsilin məzmununa şagirdlərin
tapdıqları materialların daxil edilməsi; şagird
nailiyyətinin qiymətləndirilməsində dəyişiklik;
müəllimin pedaqoji fəaliyyətdə baş verəcək
dəyişikliklərə hazır olması daxildir.
Bütün bunlardan belə nəticəyə gəlmək olar ki,
müəllimlərdən ənənəvi metodlarla yanaşı, yeni
interaktiv üsullarla işləmək bacarığı da tələb
olunur.
Ayğun BAXIŞOVA,
Bakıdakı İ.Hacıyev adına
"Tərəqqi" texniki-humanitar
liseyin ibtidai sinif müəllimi |
