Dekabrın 9-da Bakı Dövlət Universitetində doktorant və gənc  tədqiqatçıların XV Respublika elmi konfransının yekununa həsr olunmuş yığıncaq keçirildi. Tədbirdə  Təhsil Nazirliyinin nümayəndələri, ali məktəb rektorları, professor-müəllim heyətlərinin üzvləri, tədqiqatçılar iştirak edirdilər.

Konfransın yekun iclasını giriş sözü ilə təhsil nazirinin müavini İradə Hüseynova açaraq tədbir iştirakçılarını  salamladı, doktorant və gənc tədqiqatçıların XV Respublika elmi konfransının yekunu barədə  məlumat verdi. Bildirildi ki, plenar iclasdan sonra   müxtəlif elm sahələrini əhatə edən 21 bölmədə iclaslar keçirilib və 20 ali məktəbdən 401 tezislə gənc tədqiqatçıların çıxışları  dinlənilib.

Sonra  bölmə  sədrlərinin çıxışları dinlənildi və müxtəlif təkliflər irəli sürüldü.

Təhsil  nazirinin müavini İradə  Hüseynova  elm şöbəsinin əməkdaşları ilə  birlikdə   bölmə  iclaslarında fəal iştirak edən bir qrup tədqiqatçıya  Təhsil Nazirliyinin  sertifikatlarını  təqdim etdi, onlara və  elmi işlə məşğul olan bütün tədqiqatçılara uğurlar arzuladı.

Nazir müavini həm də konfransın keçirilməsində əməyi olan bütün insanlara, o cümlədən BDU-nun rektoru, millət vəkili Abel Məhərrəmova və universitetin professor-müəllim heyətinə Təhsil Nazirliyi adından təşəkkürünü  bildirdi.

Konfransda gənc tədqiqatçılardan bir qrupu çıxış edib, yaradılan  şəraitə görə Təhsil Nazirliyinə və bölmə sədrlərinə öz  minnətdarlıqlarını bildirdilər. 

Ş.CƏFƏROV