Təhsil Nazirliyinin 24 noyabr 2010-cu il tarixli əmrinə əsasən gələn ilin yanvar-mart aylarında uşaq və yeniyetmələrin elmi-texniki yaradıcılıq müsabiqəsi keçiriləcək. Müsabiqədə məqsəd uşaq və yeniyetmələrin elmi-texniki potensialının üzə çıxarılması və inkişaf etdirilməsi üçün stimulların yaradılması, onların yaradıcılıq dərnəklərinə daha geniş cəlb olunması, texniki yaradıcılıq dərnəklərinin üzvləri arasında təcrübə mübadiləsinin təşkilidir.

Müsabiqənin Əsasnaməsinə görə, yarışma texniki yaradıcılığın aviamodel, kosmik raket modeli, avtomodel, gəmi modeli və radiotexnika növləri üzrə keçiriləcək. Müsabiqə bütövlükdə 5 növ üzrə 15 nominasiyanı əhatə edəcək.

Üç mərhələdə təşkil olunması planlaşdırılmış müsabiqənin I - rayon, şəhər mərhələsi gələn ilin yanvarında, II - zona mərhələsi fevralda, sonuncu - respublika mərhələsi isə martın 11-də paytaxtda olacaq.

Müsabiqənin rayon və zona mərhələlərində hər növ üzrə I, II və III yerləri tutan iştirakçılar rayon, şəhər təhsil şöbələri və idarələri, respublika mərhələsində hər növ üzrə müvafiq yerləri tutanlar isə Təhsil Nazirliyi tərəfindən diplom və hədiyyələrlə mükafatlandırılacaqlar.

Yusif ƏLİYEV