Naxçıvan Dövlət Universitetində dahi öndərin həyat və fəaliyyətinin tədrisində və təbliğində böyük rol oynayan Heydər Əliyev Universitetinin növbəti, 140-cı məşğələsi keçirilib.

"Heydər Əliyevin dövlətçilik təlimi və müasir dövr" mövzusunda məşğələdə öncə dahi öndərin xatirəsi ehtiramla yad edilmişdir. Tərbiyə işləri üzrə prorektor, Azərbaycan Respublikasının əməkdar müəllimi, fəlsəfə elmləri doktoru Məmməd Rzayev giriş sözü ilə çıxış edərək Heydər Əliyevin bəşər tarixinə düşən dahilərdən olduğunu qeyd etmiş, ümummilli liderin xilaskarlıq missiyasından, müdrik siyasətindən, fəlsəfi görüşlərindən bəhs etmişdir.

Sonra rektor, akademik, millət vəkili İsa Həbibbəylinin mövzu üzrə dərin məzmunlu məruzəsi dinlənilmişdir. Məruzəçi Heydər Əliyevin yeni Azərbaycanın banisi, ən böyük azərbaycanşünas, Azərbaycançılıq ideologiyasını böyük siyasətə gətirməklə dünya azərbaycanlılarının həmrəyliyinə nail olmuş bir düha olduğunu vurğulamışdır. Qeyd olunmuşdur ki, xalqımızın milli mənəviyyatının, tarixi dövlətçilik ənənələrinin, milli şüurunun və siyasi təfəkkür tərzinin kamil daşıyıcısı olan bu böyük şəxsiyyət Azərbaycanın müstəqilliyinin qorunması, demokratik və inkişaf etmiş dövlətlər səviyyəsinə çatması uğrunda gərgin siyasi mübarizələr aparmışdır. Azərbaycanın beynəlxalq nüfuzunun artması, iqtisadiyyatının, mədəniyyətinin inkişafı, ölkədə elm, təhsil, ordu quruculuğu sahəsində görülən məqsədyönlü işlər ulu öndərin dövlətçilik təliminin dərsləridir. Millət vəkili məruzəsində respublikada, o cümlədən Naxçıvanda gedən dinamik inkişafdan söz açaraq vurğulamışdır ki, Azərbaycanın müasir dövrdə qazandığı sosial-iqtisadi, siyasi uğurlar məhz Heydər Əliyev siyasi kursunun qətiyyətlə davam etdirilməsinin nəticəsidir.  Rektor əminliyini bildirmişdir ki, gənclik Heydər Əliyev ideallarını rəhbər tutaraq Azərbaycanın gələcək tərəqqisi naminə var qüvvələrini əsirgəməyəcək.  

Mehriban SULTAN