Türkiyənin İğdır şəhərində 500 şagirdin təhsil aldığı Heydər Əliyev liseyinə Azərbaycan xalqının ümummilli liderinin adının verilməsinin davamı olaraq məktəbdə bununla bağlı lövhənin asılması mərasimi keçirilmişdir.

AzərTAc xəbər verir ki, bu barədə jurnalistlərə məktəbin direktoru Tuna Ok məlumat vermişdir. Tuna Ok türk dünyasının dahi şəxsiyyəti Heydər Əliyevin adının liseyə verilməsini və bununla bağlı məktəbdə lövhənin asılmasını mühüm hadisə kimi qiymətləndirmişdir.

Tədbirdə çıxış edən Azərbaycanın Qars şəhərindəki baş konsulluğunun İğdır şəhəri üzrə nümayəndəsi Rafiq Rüstəmoğlu ulu öndər Heydər Əliyevin xatirəsinin əbədiləşdirilməsinə görə məktəb rəhbərliyinə təşəkkür etmişdir. O demişdir ki, ümummilli lider Heydər Əliyevin adının İğdır şəhərindəki liseydə yaşadılması xalqımız tərəfindən böyük məmnunluqla qarşılanmışdır.

Daha sonra Rafiq Rüstəmoğlu məktəbi gəzmiş və şagirdlərlə xatirə şəkli çəkdirmişdir.