Təhsil sisteminin daimi təkmilləşməsi bu gün dünyanın super dövlətlərinin siyasətində mühüm məsələlərdən biri kimi xüsusi yer tutur. Bu baxımdan dünya təhsilinə inteqrasiya olunan Azərbaycan təhsilində köklü dəyişikliklər reallaşdırılmaqdadır. İslahatlar ana dilinin tədrisi üçün yeni era kimi dəyərləndirilir, ibtidai siniflər bu prosesdə  başlıca obyektdir.

Ümumiyyətlə, ana dilinin təhsil sistemində çox böyük rolu və əhəmiyyəti var. Böyük pedaqoq və ədəbiyyat tarixçisi F.B.Köçərli haqlı olaraq "Ana dili millətin mənəvi diriliyidir", - deyə vurğulamışdır.

Ruhun qidası olan ana dili (F.B.Köçərli) ailədə, uşaq bağçası və məktəbdə təlim və tərbiyədə mühüm vasitədir; ana dilinin öyrənilməsi məktəblilərin ünsiyyət imkanlarını genişləndirir, düşünmə, öyrənmə və danışma bacarıqlarını formalaşdırır. Buradan da ana dili tədrisi metodikasının problemlərinin tədqiqi həmişə aktualdır.

Pedaqoji elmlər namizədi Şəlalə Nəbiyevanın "Ana dili tədrisi metodikasının aktual problemləri" metodik vəsaiti (elmi redaktor filologiya elmləri doktoru, professor Buludxan Xəlilov, rəyçilər filologiya elmləri doktoru, professor Himalay Qasımov, professor Nadir Abdullayevdir) ibtidai sinif müəllimləri üçün dəyərli olacaqdır.

Kitabda ibtidai siniflərdə ana dili təliminin nəzəri əsasları, ana dili tədrisinin və dərsliklərinin tarixi ənənələri, ana dili tədrisinə dair müasir təhsil nəzəriyyələri, dil öyrənmənin mərhələləri, məktəbəqədər dövrdə dilin mənimsənilməsi imkanları, müasir dərs və qiymətləndirmə... kimi məsələlər ayrı-ayrılıqda şərh olunmuşdur.

Metodik vəsaitin sonunda əlavələr verilmiş, sinif müəllimlərinin ehtiyacı nəzərə alınaraq təlimin fənn kurikulumları əsasında planlaşdırılması da kitaba daxil edilmişdir. 

E.ƏBDÜLOV