Aprelin 22-də Təhsil Nazirliyində texniki yaradıcılıq mərkəzləri direktorları ilə müşavirə keçirildi. Müşavirədə bu müəssisələrin fəaliyyətinin daha da yaxşılaşdırılması və maddi-texniki bazalarının möhkəmləndirilməsi məsələləri müzakirə olundu. Tədbiri təhsil nazirinin müavini Elmar Qasımov açaraq bu ilin fevral-aprel aylarında keçirilən uşaq və yeniyetmələrin elmi-texniki yaradıcılıq müsabiqəsində  fəal iştirak edən yaradıcılıq mərkəzlərinin direktorlarına təhsil naziri Misir Mərdanovun təşəkkürünü çatdırdı. Müsabiqə barədə ətraflı məlumat verən nazir müavini bildirdi ki, uşaq və yeniyetmələrin elmi-texniki yaradıcılıq müsabiqəsi Təhsil Nazirliyi, Gənclər və İdman Nazirliyi və Azərbaycan Həmkarlar İttifaqları Konfederasiyasının birgə qərarı ilə keçirilib. Müsabiqədə məqsəd uşaq və yeniyetmələrin elmi-texniki potensialının üzə çıxarılması, onların yaradıcılığının inkişaf etdirilməsi üçün stimulların yaradılması və şagirdlər arasında təcrübə mübadiləsinin təşkil olunmasıdır.

Elmar Qasımov müsabiqənin əhəmiyyətini qeyd edərək belə tədbirlərin keçirilməsini təqdirəlayiq hal kimi qiymətləndirdi. O, əsrimizin texnika əsri olduğunu, şagirdlərin bu sahədə dünya şagirdlərindən geri qalmamasının vacibliyini vurğuladı. Lakin bu işdə problemlərin olduğunu da deyən nazir müavini bir neçə şəhər və rayon texniki yaradıcılıq mərkəzinin müsabiqədə  passiv iştirak etdiyini diqqətə çatdırdı. Bu baxımdan  Ağdam, Şamaxı, Yardımlı və Lerik rayonlarının texniki  yaradıcılıq  mərkəzlərinin direktorlarının  işlərindən  narazı  olduğunu  və  bu  istiqamətdə  ciddi addımların   atılacağını   bildirdi.

E.Qasımov müsabiqədə daha fəal iştirak edən Bakı, Sumqayıt, Mingəçevir, Şirvan, Cəlilabad, Şəmkir, Zaqatala, Hacıqabul şəhər və rayonlarının texniki yaradıcılıq mərkəzlərinin işindən razı qaldıqlarını bildirərək onların rəhbərlərinə  Təhsil Nazirliyinin diplomlarını təqdim etdi. Çıxışının sonunda texniki yaradıcılıq mərkəzlərinin rəhbərlərinə gələcək fəaliyyətlərində uğurlar arzulayan nazir müavini Elmar Qasımov onlara rayon və şəhərlərdə uşaqların əl işlərindən ibarət muzeylərin yaradılmasını tovsiyə etdi.

Tədbirin sonunda müsabiqədə fərqlənmiş 10 ən yaxşı modelin müəllifləri olan şagirlərə Təhsil Nazirliyinin diplomları və sertifikatları verildi. 

Rəşad ZİYADOV