|
Aprelin 22-də Tofiq İsmayılov adına Uşaq-Gənclər
Yaradıcılıq Sarayının "Uşaq dünyası"
qalereyasında "Təbiət bizim sərvətimizdir"
mövzusunda məktəblilərin rəsm və foto
nominasiyası üzrə respublika müsabiqəsinin
yekunu ilə bağlı tədbir keçirildi.
Təhsil Nazirliyinin Ekologiya və Təbii Sərvətlər
Nazirliyi ilə birlikdə keçirdiyi müsabiqəyə
respublikanın 60-dan çox rayon məktəblilərinin
təqdim etdiyi 2000-ə yaxın rəsmi və foto
işlərindən 700-ə yaxını mütəxəssislər tərəfindən
seçilərək müsabiqənin yekun mərhələsinə təqdim
edilmişdir. Növbəti seçimdə isə 36 rəsm və foto
işi I, II və III yerlərə layiq görülmüşdür.
Tədbiri giriş sözü ilə açan təhsil nazirinin
müavini Elmar Qasımov bildirdi ki, ekologiyanın,
təbiətin qorunmasına həsr olunmuş bu tədbir
şagirdlər arasında 3 aydır ki, keçirilir.
Müsabiqə 2 nominasiya - rəsm və foto işləri üzrə
aparılır.
Bildiyiniz kimi, möhtərəm Prezidentimiz
İlham Əliyevin sərəncamı ilə 2010-cu il
"Ekologiya ili" elan edilib. Bu ekologiya
ilinin həyata keçirilməsi ilə əlaqədar
Ekologiya və Təbii Sərvətlər Nazirliyi xüsusi
tədbirlər planı hazırlayıb müvafiq dövlət
qurumları ilə birlikdə həyata keçirir. O
cümlədən Təhsil Nazirliyi də Ekologiya və Təbii
Sərvətlər Nazirliyi ilə birgə bu tədbirin
həyata keçməsində iştirak edir.
Bu tədbirlər planından biri də bu gün burada
toplaşdığımız sərgidir.
Nazir müavini onu da qeyd etdi ki, "Təbiət bizim
sərvətimizdir" adlı bu müsabiqədə şagirdlər
iştirak etməklə həm Azərbaycanı nə qədər
sevdiklərini, həm də təbiətdə baş verən neqativ
hallara qarşı öz narahatlıqlarını bildirirlər.
Daha sonra tədbirdə çıxış edən Ekologiya və
Təbii Sərvətlər nazirinin müavini Novruz Quliyev
müsabiqə iştirakçılarına təmsil etdiyi nazirlik
adından yeni-yeni yaradıcılıq uğurları arzuladı.
Tədbirin sonunda müsabiqə qaliblərinə Təhsil
Nazirliyi və Ekologiya və Təbii Sərvətlər
Nazirliyinin diplomları və hədiyyələri təqdim
olundu.
İştirakçılar "Təbiət bizim sərvətimizdir"
mövzusunda nümayiş etdirilən rəsm və foto
işlərinə maraqla baxdılar.
Ədalət DAŞDƏMİRLİ,
Niyazi RƏHİMOV |
