NDU-da Heydər Əliyev Universitetinin 133-cü məşğələsi keçirilmişdir. "Heydər Əliyev və Azərbaycan ekologiyası" mövzusunda keçirilən məşğələni giriş sözü ilə universitetin rektoru, akademik İsa Həbibbəyli açmışdır. Rektor Azərbaycanın zəngin təbii sərvətləri, əlverişli iqlimi, flora və faunası haqqında məlumat vermişdir. Natiq müasir dünyanın qlobal problemlərindən olan ekoloji böhrandan danışmış, ekologiyanın qorunması istiqamətində Azərbaycanda irimiqyaslı tədbirlər həyata keçirilməsindən, dövlət başçısı İlham Əliyev tərəfindən 2010-cu ilin ölkəmizdə "Ekologiya ili" elan olunmasının əhəmiyyətindən söz açmışdır.

Sonra universitetin Fəlsəfə və politologiya kafedrasının müdiri, fəlsəfə elmləri namizədi, dosent Novruzəli Rəhimov mövzu üzrə əhatəli məruzə etmişdir. Məruzədə ümummilli lider Heydər Əliyevin Azərbaycanda ekologiyanın, təbiət abidələrinin mühafizəsi, dövlət qoruqlarının yaradılması sahəsində fəaliyyətindən bəhs olunmuşdur. Qeyd edilmişdir ki, Azərbaycan Respublikasının Prezidenti İlham Əliyevin müvafiq sərəncamları ilə təsdiq olunmuş "Azərbaycan Respublikasında bioloji müxtəlifliyin qorunması və davamlı istifadəsinə dair milli strategiya və fəaliyyət planı", "Ətraf mühitin mühafizəsi ilə bağlı Azərbaycan Respublikasının qoşulduğu beynəlxalq konvensiya və sazişlərdən irəli gələn məsələlər sahəsində əlavə tədbirlər", "Azərbaycan Respublikasında ekoloji vəziyyətin yaxşılaşdırılmasına dair 2006-2010-cu illər üçün kompleks tədbirlər planı" kimi mühüm dövlət sənədləri, cari ilin "Ekologiya ili" elan olunması bu sahədə atılan mühüm addımlardır. Məruzəçi Ermənistanın işğalçı siyasəti nəticəsində Vətənimizin təbiətinə qəddarlıqla ziyan vurulmasına qarşı mübarizədən də söz açmışdır. Naxçıvan Muxtar Respublikası Ali Məclisinin sədri V.Talıbovun regionda ekoloji təmizliyin mühafizəsi, yaşıllaşdırma və abadlıq işləri aparılması sahəsində məqsədyönlü fəaliyyətinə də toxunulmuşdur.

Məşğələdə slayd nümayiş etdirilmiş, diskussiya aparılmışdır. 

Mehriban SULTAN