Aprelin 17-də Azərbaycan Respublikası Təhsil Nazirliyinin Fasiləsiz Pedaqoji Təhsil üzrə Koordinasiya Şurası Azərbaycan Dövlət Pedaqoji Universiteti, Qafqaz Universiteti və Təhsil Problemləri İnstitutu birlikdə "Ali təhsildə keyfiyyəti idarəetmə mexanizmi və akkreditasiya" mövzusunda elmi konfrans keçirdi.

Konfransı giriş sözü ilə açan ADPU-nun rektoru, professor Yusif Məmmədov qeyd etdi ki, təhsildə keyfiyyətin idarəedilməsi və akkreditasiya hazırda  respublikamızın ali təhsil müəssisələri üçün aktual məsələlərdən biridir. Konfransın keçirilməsində əsas məqsəd də bu sahədə mövcud vəziyyətin təhlili, universitetlərimizin təcrübəsi və beynəlxalq təcrübə barədə fikir mübadiləsinin aparılması, yeniliklərin təbliği və qarşıda duran vəzifələrin müəyyən edilməsidir.

Sonra söz Təhsil Nazirliyi Aparatının rəhbəri İlham Pirməmmədova verildi.

Təhsil naziri Misir Mərdanovun salamlarını  tədbir iştirakçılarına çatdıran Aparat rəhbəri belə konfransların keçirilməsinin çox böyük əhəmiyyəti olduğunu vurğulayaraq bildirdi ki, təhsil sahəsində çalışan mütəxəssislərin bir yerə yığışaraq belə məsələləri müzakirə etməsi hər şeyi üzə çıxarır. Bildiyiniz kimi, ən inkişaf etmiş ölkələrdə də təhsil hər zaman yeniləşir. Ölkəmizin Prezidenti qeyd edir ki, təhsil prioritet sahədir. Elə buna görədir ki, təhsil sahəsində artıq 15 dövlət proqramı mövcuddur və bu proqramlar uğurla həyata keçirilir.

İ.Pirməmmədov daha sonra çıxışında Azərbaycanın ali məktəblərinin Boloniya prosesinə qoşulmasından, təhsildə keyfiyyəti təmin etmək üçün qarşıda duran vəzifələrdən, ali məktəblərin akkreditasiyasının vacibliyindən və s. məsələlərdən ətraflı bəhs etdi.

Konfransda daha sonra Qafqaz Universitetinin rektoru, professor Ahmet Saniç, Təhsil Problemləri İnstitutunun direktoru Abdulla Mehrabov, Təhsil Nazirliyinin Akkreditasiya şöbəsinin müdiri, professor Həbib Zərbəliyev mövzu ətrafında çıxış etdilər.

Azərbaycan Dövlət Pedaqoji Universitetinin akt zalında bir gün davam edən konfrans "Ali təhsildə keyfiyyətin idarəedilməsi" və "Ali təhsildə akkreditasiya, monitorinq və qiymətləndirmə məsələləri" mövzuları ilə bağlı 2 bölmədə professorlar Əjdər Ağayev və Əmrulla Paşayevin sədrliyi ilə davam etdirildi. Həmin bölmələr üzrə 14 məruzə dinlənildi. Məruzələrdən 10-u azərbaycanlı, 4-ü isə türkiyəli alimlər  tərəfindən edildi.

Ədalət DAŞDƏMİRLİ