Aprelin 17-də Dənizçilər Mədəniyyət  Evində Ümumtəhsil mərkəzi "XXI- ƏSR" təhsil müəssisəsinin təşəbbüsü və təşkilatçılığı ilə keçirilən "İntellekt Marafonu-2010" nun final mərhələsinin açılışı oldu.

Tədbiri giriş sözü ilə açan mərkəzin direktoru Vəfa Məmmədova  bildirdi ki,   Bakı şəhəri məktəblilərinin iştirakı ilə aparılan İntellekt marafonu Azərbaycan Respublikası Prezidenti cənab İlham Əliyevin "Xüsusi istedada malik olan uşaqların yaradıcılıq potensialının inkişafı üzrə Dövlət Proqramı" haqqında sərəncamına uyğun olaraq Təhsil Nazirliyinin dəstəyi ilə keçirilir. Bildirildi ki, marafonun keçirilməsində əsas məqsəd şagirdlərin intellektual inkişafını üzə çıxarmaq, tədrisin inkişafında intellekt texnologiyasının bir vasitə olduğunu yaymaq və yeniyetmə şagirdləri intellektual fəaliyyətə cəlb etməklə neqativ hallardan yayındırmaqdan ibarətdir.

Tədbirdə çıxış edən təhsil nazirinin müavini Elmar Qasımov belə marafonların keçirilməsini təqdirəlayiq hal kimi qiymətləndirərək bildirdi ki, Azərbaycan təhsilində "İntellekt Texnologiyası"nın tətbiqi və genişləndirilməsi əsas amillərdən biridir. Bu gün Azərbaycan şagirdi öz intellektual səviyyəsinə  və  elmi biliklərinə görə inkişaf etmiş ölkələrin şagirdlərindən geri qalmamalı, əksinə irəli getməlidir. Bunun üçün ölkəmizdə hər bir şərait yaradılıb və şagirdlərimizdə olan potensial yetərincədir. E.Qasımov belə marafonların gələcəkdə də davamlı şəkildə aparılmasını və respublikamızın bölgələrində təhsil alan şagirdlərin də bu yarışa qatılmasının vacibliyini vurguladı.

Tədbirdən sonra marafonun final mərhələsinə start verildi. 

Niyazi RƏHİMOV