Aprelin 16-da Təhsil Nazirliyində "Ən yaxşı müəllim" müsabiqəsi iştirakçılarının sınaq dərslərinin təşkil ediləcəyi məktəblərin direktorları ilə görüş keçirilib.

Təhsil naziri Misir Mərdanov görüşdə bildirib ki, ölkəmizdə 3 ildir "Ən yaxşı ümumtəhsil məktəbi" və "Ən yaxşı müəllim" müsabiqələri keçirilir. Nazir "Ən yaxşı müəllim" müsabiqəsi üzrə sənədləri ekspertizadan keçmiş müəllimlərin II mərhələdə müəyyən olunmuş qaydaya görə Bakı şəhərinin seçilmiş məktəblərində sınaq dərsi deyəcəklərini qeyd edib. Həmin məqsədlə Bakı şəhərində 26 məktəbin seçildiyini nəzərə çatdıran Misir Mərdanov məlumat verib ki, bu il müsabiqəyə 460 nəfər sənəd verib, onlardan 203 nəfəri müsabiqənin II və III mərhələsində iştirak etmək hüququ qazanıb. Təhsil naziri sınaq dərslərinin 20-23 aprel tarixlərində keçirilməsinin nəzərdə tutulduğunu qeyd edib.

Misir Mərdanov hər bir fənn üzrə sınaq dərslərinin keçirilmə tarixi və yeri barədə söz açaraq, məktəb direktorlarına sınaq dərslərinin keçirilməsinə hərtərəfli şərait yaradılması və bu işin mütəşəkkil təşkil olunmasına dair tapşırıqlar verib. 

***

Aprelin 19-da Təhsil Nazirliyində "Ən yaxşı müəllim" müsabiqəsinin iştirakçıları ilə görüş keçirilib.

Tədbiri təhsil naziri Misir Mərdanov açaraq öncə müəllimləri müsabiqənin növbəti mərhələlərində iştirak  etmək hüququ qazanmaları münasibətilə təbrik edib və hamıya sağlam rəqabətə əsaslanan bu müsabiqədə uğurlar arzulayıb. Nazir ölkəmizin yüksək biliyə, bacarığa malik müəllimlərinin, eləcə də öz uğurları ilə tanınan, sayılıb-seçilən məktəblərinin həmin müsabiqənin qalibi olduğunu görüş iştirakçılarının diqqətinə çatdırıb. Təhsil naziri Misir Mərdanov müsabiqənin təhsil ictimaiyyəti tərəfindən böyük maraqla qarşılandığını və iştirak etmək üçün sənəd verənlərin sayının ilbəil artdığını qeyd edib. "Ən yaxşı müəllim" müsabiqəsinə, hər il olduğu kimi, bu il də böyük məsuliyyətlə yanaşıldığını deyən nazir müsabiqədə iştirak etmək üçün sənəd təqdim edənlər və növbəti mərhələyə vəsiqə qazananlar haqqında statistik məlumatları diqqətə çatdırıb. Təhsil naziri sınaq dərsi deyəcək müəllimlərə bir sıra tövsiyələrini verib, aparacaqları dərslərdə öz bilik və bacarıqlarını tam nümayiş etdirmələrinin vacibliyini vurğulayıb.

Nazir Misir Mərdanov bildirib ki, hər bir sınaq dərsi videolentə alınacaq, dərslərin təhlili müəllimlərin öz  iştirakı ilə aparılacaqdır. Təhsil naziri bu mərhələ başa çatdıqdan sonra  müəyyən olunmuş müddətdə  Təşkilat Komitəsinin iclasında müəllimlərin 10 dəqiqəlik təqdimatlarının dinləniləcəyini  və təqdimatlarda onların fəaliyyətlərinin əsas istiqamətlərinin, uğurlarının, həmin uğurlara necə nail olmalarının, rəy və təkliflərinin  öz əksini tapmalı olduğunu söyləyib.

Görüşün sonunda nazir Misir Mərdanov müsabiqə iştirakçılarını maraqlandıran suallara cavab verib.  

***

Həmin gün Təhsil Nazirliyində müsabiqə iştirakçılarının deyəcəkləri sınaq dərslərini qiymətləndirəcək ekspertlərlə də görüş keçirilib. Nazir Misir Mərdanov bildirib ki, müsabiqə iştirakçılarının sınaq dərslərini dinləyib qiymətləndirmək üçün  təcrübəli təhsil işçilərindən, nazirliyin və ona tabe qurumların əməkdaşlarından, ötən ilki müsabiqələrin qalibləri olan müəllimlərdən ibarət ekspert komissiyaları yaradılıb. Bu zaman fənlər üzrə müsabiqə iştirakçılarının sayı nəzərə alınıb və daha çox müəllimin iştirak etdiyi ibtidai sinif, ingilis dili, tarix, dil-ədəbiyyat fənləri üzrə bir neçə ekspert komissiyası yaradılıb. Ekspert komissiyalarının əksəriyyətinin 3, bəzilərinin 4, bir neçə komissiyanın isə 2 nəfərdən təşkil olunduğunu diqqətə çatdıran nazir sınaq dərslərinin qiymətləndirilməsi qaydası ilə də ekspertləri tanış edib.

Misir Mərdanov qiymətləndirmə proseduru barədə də danışaraq bildirib ki, müəyyənləşdirilmiş qaydaya əsasən ekspertlərin hər meyar üzrə verdikləri qiymətlər (ballar) toplanır, alınan rəqəm ekspertlərin sayına bölünür. Bundan alınan rəqəm isə yenidən meyarların sayına, yəni 12-yə bölünür. Həmin nəticə sınaq dərsi deyən müəllimin yekun nəticəsi hesab olunur. Nəticələr elə həmin gün də müəllimlərə elan olunur.

Nazir qiymətləndirmə zamanı əsas məsələlərdən birinin obyektivliyin gözlənilməsi olduğunu vurğulayıb. Ekspertlərə bu prinsipə əməl etməyi, ədalətli olmağı, dərslərin dinlənilməsi zamanı dəqiq qeydiyyat aparıb tutulan iradlara müəllimləri inandıra bilməyi, dərs dinlənilərkən müəllimin işinə heç bir halda müdaxilə etməməyi tövsiyə edib.

Təhsil naziri ekspertlərə dərslərin dinlənilməsi və qiymətləndirilməsi zamanı gözlənilməsi vacib olan bir sıra məsələlərlə bağlı tapşırıqlar da verib. 

B.CAVADLI,
S.KƏRİMOVA,
Y.ƏLİYEV