Aprelin 22-də Azərbaycan Dövlət Pedaqoji Universitetinin pedaqoji fakültəsinin yaranmasının 50 illik yubileyi qeyd olundu.

Yubiley mərasimindən əvvəl ali təhsil ocağının kollektivi, dəvət olunmuş qonaqlar Fəxri xiyabana gələrək ümummilli lider Heydər Əliyevin xatirəsini ehtiramla yad etdilər, məzarı önünə əklil qoydular. Tədbir iştirakçıları görkəmli oftalmoloq-alim, akademik Zərifə xanım Əliyevanın da məzarını ziyarət etdilər.

Azərbaycan Dövlət Pedaqoji Universitetinin böyük zalında keçirilən yubiley tədbirində təhsil naziri Misir Mərdanov, Bakı Şəhəri üzrə Təhsil  İdarəsinin müdiri Nailə Rzaquliyeva, Təhsil Nazirliyinin müvafiq şöbələrinin müdirləri,  Türkiyə Respublikası Yüksək Öyrətim Kurumunun məsul şəxsləri, Hacəttəpə Universitetinin əməkdaşları, millət vəkilləri, respublikanın tanınmış alim və pedaqoqları, bir sıra dövlət və qeyri-dövlət ali məktəblərinin rəhbərləri, universitetin müəllim və tələbələri iştirak edirdilər.

Mərasimi Azərbaycan Dövlət Pedaqoji Universitetinin rektoru, AMEA-nın müxbir üzvü, əməkdar elm xadimi, professor Yusif Məmmədov açaraq ölkəmizdə yüksəkixtisaslı pedaqoji kadr hazırlığında 90 ilə yaxın şərəfli inkişaf yolu keçmiş Azərbaycan Dövlət Pedaqoji Universitetinin təhsil sahəsindəki xidmətlərindən danışdı. Ali təhsil ocağında fəaliyyət  göstərən fakültələr arasında pedaqoji fakültənin xüsusi yeri və rolu olduğunu qeyd edən professor Yusif Məmmədov 1958-1959-cu tədris ilindən ibtidai təhsilin pedaqogika və metodikası adı ilə fəaliyyətə başlamış bu fakültənin 50 il ərzində 15 minə yaxın məzunu olduğunu söylədi. Daha sonra pedaqoji fakültənin yüksəkixtisaslı ibtidai sinif müəllimi hazırlığı işində səmərəli fəaliyyətindən bəhs edən rektor görülən işlərdən razılıqla danışdı.

Sonra çıxış üçün söz təhsil naziri, professor Misir Mərdanova verildi.

Nazir ölkə təhsilinin, elminin uğurlu inkişafından söz açaraq, ümummilli liderimiz Heydər Əliyevin hər zaman müəllimlik sənətinə yüksək dəyər verdiyini, onun layiqli davamçısı ölkə Prezidenti cənab İlham Əliyev tərəfindən də Azərbaycan təhsilinə, elminə diqqət və qayğı ilə yanaşıldığını xüsusi vurğuladı.

Misir Mərdanov yubileyi qeyd olunan pedaqoji fakültənin fəaliyyətini müsbət qiymətləndirərək hazırda müəllimlərin qarşısında duran mühüm vəzifələrə toxundu. Təhsil naziri Azərbaycan Dövlət Pedaqoji Universitetinin pedaqoji fakültəsinin bir qrup əməkdaşına yüksəkixtisaslı kadrların hazırlanması sahəsində səmərəli pedaqoji fəaliyyətinə görə və fakültənin 50 illik yubileyi münasibətilə "Azərbaycan Respublikası qabaqcıl təhsil işçisi" döş nişanını  və Fəxri fərmanları  təqdim etdi.

Nazir  Misir Mərdanov çıxışının sonunda Azərbaycan Dövlət Pedaqoji Universitetinin rəhbərliyini, pedaqoji fakültənin müəllim və tələbələrini yubiley münasibətilə təbrik etdi, onlara gələcək fəaliyyətlərində yeni-yeni uğurlar arzuladı.

Yubiley mərasimində pedaqoji fakültənin dekanı, professor Fərrux Rüstəmov "Şərəfli 50 il" mövzusunda geniş məruzə etdi. Məruzədə pedaqoji fakültənin keçdiyi tarixi yoldan, əldə edilən müvəffəqiyyətlərdən söz açıldı. Qeyd olundu ki,fəaliyyət göstərdiyi müddətdə  fakültədə tədris işinin yüksək səviyyədə qurulmasına,  tələbələrin yüksəkixtisaslı müəllim kadrları kimi hazırlanmalarına, onların mənəvi-estetik tərbiyəsinə və ləyaqətli vətəndaş kimi formalaşmasına həmişə ciddi diqqət yetirilmişdir. Son illər, bütün universitetlərdə olduğu kimi, bu ali təhsil ocağının  pedaqoji fakültəsində də tədrisin keyfiyyəti xeyli yüksəlmiş, təhsilin yeni texnologiyalar əsasında təşkilində ciddi uğurlar qazanılmışdır.    

Çıxış edənlərdən Türkiyə Respublikası Hacəttəpə Universitetinin pedaqoji fakültəsinin dekanı, professor Buket Akkoyunlu, İran İslam  Respublikasının ölkəmizdəki fövqəladə və səlahiyyətli səfiri, doktor Məhəmmədbağır Bəhrami, AMEA-nın Şərqşünaslıq İnstitutunun direktoru, professor, millət vəkili Gövhər Baxşəliyeva 50 il şərəfli ömür yolu keçmiş pedaqoji fakültənin kollektivini təbrik edərək, onlara ən xoş arzularını çatdırdılar.

Yubiley tədbiri ali təhsil ocağının pedaqoji fakültəsi tələbələrinin hazırladıqları musiqili kompozisiya ilə başa çatdı.    

Samirə KƏRİMOVA