Aprelin 20-də akademik Zərifə Əliyeva adına məktəbdə ümummilli liderimiz Heydər Əliyevin anadan olmasının 87-ci ildönümü münasibətilə ümumtəhsil məktəblərinin şagirdləri arasında təşkil olunan inşa müsabiqəsinin yekun mərhələsi keçirildi.

Müsabiqənin açılış mərasimində Azərbaycan Respublikasının təhsil naziri Misir Mərdanov, Yeni Azərbaycan Partiyasının sədr müavini-icra katibi Əli Əhmədov, Azərbaycan Həmkarlar İttifaqları Konfederasiyasının sədri Səttar Mehbalıyev, Təhsil Nazirliyinin əməkdaşları və KİV nümayəndələri iştirak edirdilər.

İki mərhələdə təşkil edilən tədbirdə respublikamızın ayrı-ayrı rayon və şəhərlərinin, eləcə də Bakının ümumtəhsil məktəblərinin, Təhsil Nazirliyinin tabeliyində, ali məktəblərin nəzdində fəaliyyət göstərən lisey və gimnaziyaların, peşə liseyləri və özəl məktəblərin şagirdləri iştirak edir. İlin əvvəlindən başlayan müsabiqəyə həmin məktəblərin minlərlə şagirdi qatılıb və onların ən qabiliyyətliləri təhsil nazirinin "İnşa müsabiqəsinin yekun mərhələsinin keçirilməsi barədə" 9 aprel 2010-cu il tarixli əmrinə əsasən təşkil edilən son turda iştirak etmək hüququ qazanıblar.

Tədbirin keçirildiyi zalda ümummilli liderimiz Heydər Əliyevə həsr edilmiş fotostendlər, kitab sərgiləri hazırlanmış, onun müdrik kəlamları yazılmış lövhələr asılmışdı.

Mərasimi açan təhsil naziri Misir Mərdanov iştirakçıları salamladı və öz istedadları ilə fərqlənərək final mərhələsinə vəsiqə qazanmış məktəbliləri təbrik etdi.

Təhsil naziri ümummilli liderimiz Heydər Əliyevin anadan olmasının ildönümlərinə həsr edilmiş inşa müsabiqəsinin artıq bir ənənəyə çevrildiyini və Azərbaycanda həyata keçirilən ən kütləvi tədbir olduğunu qeyd etdi.

Məktəblilərin müsabiqəyə böyük maraq və həvəs göstərmələrini əlamətdar bir hal kimi dəyərləndirən Misir Mərdanov məlumat verdi ki, bu il rayon (şəhər) mərhələsində yarım milyona yaxın yuxarı sinif şagirdi iştirak etmişdir. Ölkənin, demək olar ki, bütün rayon və  şəhərləri təmsil olunmaqla, onlardan 97 nəfəri müsabiqənin yekun mərhələsinə vəsiqə qazanmışdır.

Nazir müsabiqə iştirakçılarının diqqətinə çatdırdı ki, inşa yazmaq üçün 3 saat vaxt verilir. Yazılar bir neçə gün ərzində xüsusi ekspertlər tərəfindən yoxlanılacaq. Hər yazını 3-4 mütəxəssis yoxlayacaq, onların nəticələrinə əsasən ümumi qiymət çıxarılacaq və yekun mərhələsinin qalibləri müəyyənləşdiriləcək.

Müsabiqəyə dahi rəhbərimiz, ümummilli  liderimiz Heydər Əliyevin anadan olmasının 87-ci ildönümü ərəfəsində yekun vurulacağını deyən Misir Mərdanov bu münasibətlə "Gülüstan" sarayında keçiriləcək təntənəli mərasimdə qaliblərə mükafat və müxtəlif hədiyyələrin təqdim olunacağını qeyd etdi və ən yaxşı işlərin toplu şəklində nəşr ediləcəyini bildirdi. Təhsil naziri çıxışının sonunda hamıya uğurlar arzuladı.

Sonra müsabiqənin yekun mərhələsinin mövzusu elan  edildi və məktəblilər "Ulu öndər Heydər Əliyevi düşünərkən..." adlı inşa yazmağa başladılar. 

Hicran ƏKBƏROVA