Aprelin 21-də İ.Əfəndiyev adına Elitar Gimnaziyada Türkiyənin ən gənc ali məktəblərindən olan Okan Universitetini tanıtma mərasimi keçirildi. Türkiyə Respublikasının ölkəmizdəki səfirliyinin təşəbbüsü və Azərbaycan Respublikası Təhsil Nazirliyinin birgə təşkilatçılığı ilə keçirilən mərasimdə nazir Misir Mərdanov, səfir Hulusi Kılıç, sözügedən universitetin ölkəmizdə səfərdə olan nümayəndə heyəti, Təhsil Nazirliyinin tabeliyindəki lisey və gimnaziyaların direktorları, müəllimləri və yuxarı sinif şagirdləri iştirak edirdilər.

Tədbiri təhsil naziri Misir Mərdanov açaraq qardaş ölkə təmsilçilərini və mərasimin digər iştirakçılarını səmimi salamladı, qonaqları Azərbaycanda görməsindən məmnun olduğunu dedi.

Nazir bildirdi ki, Türkiyənin 7 il öncə qurulmuş Okan Universitetinin rektoru və onun rəhbərlik etdiyi çoxsaylı nümayəndə heyəti ölkəmizdə səfərdədir. Səfərdə məqsəd ölkələrimiz arasında təhsil sahəsində əlaqələri daha da möhkəmlətmək, Okan Universitetini Azərbaycanda tanıtmaq və gələcəkdə Azərbaycandan Türkiyəyə təhsil almağa gedəcək gənclərin içərisindən bu ali məktəbi seçənlərin sayını artırmaqdır. Ölkəmizdə olduğu iki gün ərzində nümayəndə heyətinin Bakı şəhərinin bir neçə məktəbi ilə yaxından tanış olduğunu və razı qaldığını deyən nazir  hörmətli qonaqların ölkəmizə ilk gəlişinin son gəliş olmayacağına, gələcəkdə belə səfərlərin daha tez-tez həyata keçiriləcəyinə inandığını söylədi.

Azərbaycanla Türkiyə arasında münasibətlərin yüksək səviyyədə olduğunu vurğulayan Misir Mərdanov iki ölkənin təhsil sahəsində əməkdaşlığının da yüksələn xətlə inkişaf etdiyini, hazırda Türkiyə universitetlərində  ölkəmizdən 5 minədək gəncin təhsil aldığını diqqətə çatdırdı.

Türkiyə Respublikasının ölkəmizdəki fövqəladə və səlahiyyətli səfiri cənab Hulusi Kılıç təşəbbüslərinə sayğı ilə yanaşdığına və tədbirin təşkilinə göstərdiyi dəstəyə görə təhsil nazirinə minnətdarlığını bildirdi. Səfir müasir dünyada təhsilin rolunun getdikcə artdığını qeyd edib, hər iki ölkədə bu sahənin inkişafına böyük önəm verildiyini söylədi.

Türkiyə universitetlərinin hazırda öz qarşılarına daha çox xarici öyrənci cəlb etmək məqsədi qoyduqlarını vurğulayan səfir keçirilən tədbiri bu baxımdan yüksək qiymətləndirib, gələcəkdə belə görüşlərin Türkiyənin digər universitetləri ilə də təşkil olunacağını bildirdi.

Tədbirdə söz alan Okan Universitetinin rektoru, professor Sadık Kırbaş rəhbərlik etdiyi nümayəndə heyətinin ölkəmizdə səmimi qarşılandığına görə məmnunluq duyduğunu söylədi və tədbirin təşkilatçılarına təşəkkür etdi. Rektor bildirdi ki, artıq ikinci dəfədir ölkəmizdə olur. İlk gəlişində Bakı Dövlət Universiteti ilə Okan Universiteti arasında əməkdaşlıq haqqında müqavilə imzalanıb.

Sonra rektor universitetləri haqqında məlumat verdi.

Tədbirdə İstanbul və Okan Universiteti haqqında qısametrajlı filmlər nümayiş olundu. Okan Universitetinin ədəbiyyat fakültəsinin dekan yardımçısı Hulya Arslan bu ali təhsil ocağı barədə geniş təqdimatla çıxış etdi.

Sonda təhsil naziri Misir Mərdanov, Okan Universitetinin rektoru, professor Sadık Kirbaş şagirdlərin çoxsaylı suallarını cavablandırdılar. 

Yusif ƏLİYEV