Aprelin 30-da Bakıdakı 335 nömrəli körpələr evi-uşaq bağçasında keçirilmiş "Doğma diyar Azərbaycan" mövzusunda "açıq məşğələ"də məqsəd yuxarı yaş qrupunda tərbiyə alan uşaqların il ərzində ekoloji biliklərə nə dərəcədə yiyələndiklərini aşkara çıxarmaq, bu sahədə toplanmış təcrübəni bölüşmək idi.

Tədbirdə iştirak edən Təhsil Nazirliyinin Məktəbəqədər təhsil sektorunun müdiri Nərminə Alnağıyeva, Bakı Şəhəri üzrə Təhsil İdarəsinin əməkdaşları Leyla İmanova, Tamilla Allahverdiyeva, Südabə Abdullayeva, Tamilla Useynova, Üzeyir Hacıbəyli adına Bakı Musiqi Akademiyasının elmi və yaradıcı iş üzrə prorektoru, əməkdar incəsənət xadimi, professor Gülnaz Abdullazadə və bir qrup bağça müdiri öncə 2008-ci ildə istifadəyə verilmiş bu təhsil ocağında uşaqların təlim-tərbiyəsi, inkişafı, sağlamlığının qorunması üçün yaradılmış şəraitlə  tanış  oldular,  tərbiyəçilərin və istedadlı  uşaqların bağçanın dəhlizlərində və foyesində  nümayiş  olunan  əl  işləri  və  rəsmlərinə   tamaşa   etdilər.

Tədbiri bağçanın müdiri Sevda Almuradova açaraq, "açıq məşğələ"nin mövzusu, bağçalarında uşaqların ekoloji tərbiyəsi yönündə görülmüş işlər haqqında danışdı.

Musiqi sədaları altında zala daxil olan uşaqlar tədbir iştirakçılarını salamladıqdan sonra məşğələ başladı. Bağçanın böyük və məktəbəqədər yaş qruplarından olan uşaqlarla "açıq məşğələ"ni tərbiyəçilər Şəhla Vəliyeva və Nailə Hacıyeva aparırdılar. Musiqi zalında Azərbaycanın xəritəsi asılmış, hər birinin üzərində ölkəmizin təbiətini, maddi və mənəvi sərvətlərini, dövlətimizin atributlarını əks etdirən əyani vəsaitlərin düzüldüyü masalar yerləşdirilmişdi. Tərbiyəçilər əvvəlcə müxtəlif suallar verməklə uşaqların xəritə üzrə biliklərini yoxladılar.

Sonra tərbiyəçilər onları dövlətimizin atributlarının təsvirləri olan stolun ətrafına dəvət etdilər və suallar verdilər. Uşaqlar verdikləri cavablarla dövlət atributlarını tanıdıqlarını, onları təşkil edən elementlərin mahiyyətini bildiklərini nümayiş etdirib, onlara aid şeirlər, tapmacalar, atalar sözləri söylədilər, xorla himnimizi ifa etdilər. "Sərvətlərimiz", "Uşaq hüquqları və ordumuz", "Yazıçılarımız, milli ornamentlərimiz" adlandırılan digər masalar ətrafında da bu qaydada iş aparıldı. "Açıq məşğələ" uşaqların ifasında şeir və mahnılardan, rəqs və səhnəciklərdən ibarət nömrələrlə, bağçada keçirilmiş tədbirlərə dair videoçarxın nümayişi ilə başa çatdı.

Məşğələdən sonra onun təhlili aparıldı. N.Alnağıyeva, L.İmanova, G.Abdullazadə, S.Abdullayeva və b. çıxış edərək "açıq məşğələ"nin yaxşı keçdiyini, aparılan təlim-tərbiyə işinin nəticəsində uşaqların ölkəmiz, onun ekologiyası barədə zəruri bilik və məlumatlara yiyələndiklərini, ümumiyyətlə, tədbirin yüksək səviyyədə hazırlandığını, qısa fəaliyyəti dövründə bağçada bir çox istiqamətlərdə müsbət təcrübə toplandığını qeyd etdilər, pedaqoji kollektivə fəaliyyətində uğurlar arzuladılar. 

Yusif ƏLİYEV